İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 102 Hüküm no: 66 Orijinal metin no: [33-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Silah altında bulunan mülazım-ı sânî rütbesinde vefat edenlerin terekelerinden harc-ı kısmet alınmadığı gibi vâris ve vekillere verilen ilâmlardan da harç alınmaması Numara 13 Taraf-ı âlî-yi Meşîhat-penâhîye Ma‘rûz-ı bende-i dîrîneleridir ki, Silk-i askerîde ve silâh altında bulunanlardan mülâzım-ı sânînin mâ-dûnunda olarak vefât edenlerin muhallefâtından harc-ı kısmet alınmaması zât-ı vâlâ-yı cenâb-ı Meşîhat-penâhîleriyle bi’l-muhâbere verilen karâr üzerine fî 23 Ca sene [1]284 târihiyle her tarafa ta‘mîmen beyân ve iş‘âr kılınmış idi. Bu misillü muhallefât için vereseye veyâ vekîllerine i‘tâsı lâzım gelen i‘lâmlardan dahi harç alınıp alınmaması ba‘zı mahallerden suâl edilmiş olup beyândan âzâde olduğu üzere o makūle muhallefâtdan harc-ı kısmet alınmaması emrinde olan müsâ‘ade-i mahsûsa bunların erbâb-ı fakr ve ihtiyâcdan olan familyalarının masrafdan vikāyesi maksadına mebnî ve zâten mülâzım-ı sânînin mâ-dûnunda bulunan efrâd-ı askeriyenin zuhûr edecek muhallefât ve terekâtının cüz’iyeti dahi bedîhî olduğu gibi müsâ‘ade-i mebhûse işin şu cihetine de bi’t-tab‘ şâmil olduğundan ba‘de ezîn efrâd-ı merkūme muhallefâtı için ber-minvâl-i muharrer vereseye veyâhûd verese vekîllerine verilecek i‘lâmlardan dahi harç alınmaması zât-ı sâmî-i Seraskerî’ye bi’l-muhâbere karârlaşdırılarak keyfiyet aklâm-ı askeriyeye kayd ile ordu-yı hümâyûnlar müşîrliklerine ve vilâyâta bildirilmiş olmağla işbu usûlün ale’d-devam mer‘iyyü’l-icrâ tutulması emrinde Bâb-ı Vâlâ-yı Fetvâ-penâhîlerince dahi îcâbının icrâsı bâbında emr ü irâde hazret-i men-lehu’l-emrindir. Fî 16 Muharrem sene [1]288, fî 25 Mart sene [1]287.