İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 113 Hüküm no: 80 Orijinal metin no: [41-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alış-veriş davalarında nakid cinsinin tayin edilerek râyic fiyatının da yazılması İ‘lâmlarda nakid cinsinin ta‘yîni hakkında İstanbul kādısı fazîletlü efendi hazretleri Fazîletlü efendim hazretleri, Mu‘âmelât-ı ahz ü i‘tâda semen-i müsemmâ olan akçe bir cinse münhasır olmayarak ecnâs-ı adîde üzere bulunduğundan ve bunlardan her cins sikkenin râyici vakit vakit tezâyüd ve tedennî eylediğinden mehâkim-i şer‘iye ve nizâmiyeden verilen i‘lâmâtda mahkûmun-bih olan akçenin esnâ-i tahsîlinde ekseriyâ nizâ‘ ve tereddüd vukū‘ bulmakda olduğuna binâen ba‘de ezîn mehâkim-i şer‘iye ve nizâmiyeden verilecek i‘lâmâtda iddi‘â olunan akçe cins ve aded üzerine olmayıp da guruş bulunduğu takdîrde buna bir cins ta‘yîniyle meselâ mahkûmun-bih şu kadar guruşun mecîdiye yüzlük veyâhûd Fransız altını veyâ mecîdiye ve karbondan herbiri şu fî-i râyic ile tahsîl kılınmasının beyân ve îzâh olunması zımnında hükkâm-ı kirâma tenbîhât-ı lâzımenin icrâsı Dîvân-ı Ahkâm-ı Adliye karâr-ı âlîsinden olduğu dîvân-ı mezkûr nezâret-i celîlesinden iş‘âr buyurulmuş olmağla ba‘de ezîn ol vechile i‘tâ buyrulacak vesâik-i şer‘iyede mahkûmun-bih olan akçenin cins ve fî-i râyicin derc ve tasrîh olunması husûsunun lâzım gelenlere teblîğ ve tenbîh buyurulması siyâkında tezkire-i senâverî terkīmine ibtidâr kılındı. Fî 27 Cumâdelûlâ sene [12]89. Muhtâr