İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 117 Hüküm no: 88 Orijinal metin no: [43-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İlâmlarda davacı ve davalıların isimleri yanında diğer bilgilerinin de yer alması Celblerde müdde‘î ve müdde‘â-aleyhin isimlerinin yazılması hakkında Taraf-ı âlî-yi hazret-i Meşîhat-penâhîye Dîvân-ı Ahkâm-ı Adliye’den Ma‘rûz-ı bende-i dîrîneleridir ki, Dersa‘âdet ve bilâd-ı selâsede bulunan bi’l-cümle mehâkim-i şer‘iye ve nizâmiyede hukūka dâir tanzîm ve i‘tâ olunan i‘lâmâtın tenfîz-i ahkâmı icrâ cemi‘iyeti vezâfi-i mahsûsasından olduğu gibi icrâat dahi müdde‘î ile müdde‘â-aleyhin celb ve ihzârıyla hâsıl olacağı cihetle i‘lâmâtda dâyin ile medyûnun isim ve şöhretinin ve bulunduğu sınıf ve mahâll-i ikāmetinin derc ve îzâh olunması nizâmı iktizâsından iken ekser i‘lâmâtda buna dâir bir sarâhat görülemediğine ve îzâhât-ı kâfiye olmadıkça müddeî ve müdde‘â-aleyhin bulunması bir hayli taharrî ve külfete ve beyhûde izâ‘e-i vakt ile teehhur-ı maslahata sebeb olmakda idiğine binâen mücerred teshîl ve tesrî‘-i mu‘âmelât-ı ibâd için ba‘de ezîn mehâkim-i şer‘iye ve nizâmiyeden verilecek i‘lâmâta usûlüne tevfîkan müdde‘î ve müdde‘â-aleyhin isim ve şöhretiyle bulundukları sınıf ve sâkine oldukları mahalle ve çarşının ve mümkün olduğu hâlde han ve dükkân numarasının derc edilmesi lüzûmu cem‘iyet-i mezkûreden vukū‘ bulan teblîğ üzerine 16 Muharrem sene [12]89 târihinde makām-ı sâmî-i Meşîhat-penâhîleriyle lâzım gelen devâire ta‘mîmen bildirilmiş ise de yine bu usûle ri‘âyet olunmadığından te’kîd-i keyfiyet olunması lüzûmu bu kerre cem‘iyet-i mezkûreden ifâde kılınmağla iş‘âr-ı sâbık vechile icrâ-yı îcâbının iktizâ edenlere emr ü tenbîh buyurulması bâbında emr ü fermân hazret-i men-lehu’l-emrindir. Fî 27 Muharrem sene [1]290 ve fî 14 Mart sene [1]289. Midhat