İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 137 Hüküm no: 112 Orijinal metin no: [53-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Hilmi Efendi b. Osman Efendi’nin Ali Rıza Efendi b. Mustafa’ya borcu olduğu Hilâl-i Ramazan sübûtunu ısbât Ketebeden el-Hâc Ali Rıza Efendi b. Mustafa Efendi meclis-i şer‘-i şerîf-i enverde işbu bâ‘isetü’l-vesîka es-Seyyid Mehmed Hilmi Efendi b. Osman Efendi mahzarında takrîr-i kelâm edip mûmâ-ileyh Mehmed Hilmi Efendi zimmetinde semeni işbu sene-i mübâreke şehr-i Ramazanü’l-mübâreki gurresine müeccel olmak üzere malımdan ve yedimden iştirâ ve kabz eylediği bir aded sübha semeninden elli guruş alacak hakkım olup şehr-i şerîf-i mezkûrun hilâli işbu pazar gecesi vakt-i gurûbdan beş dakīka mürûrunda İstanbul’da Cerrâhpaşa Câmi‘-i şerîfi minâresinden rü’yet olunup ol vechile ecel-i mezkûr hulûl etmekle meblağ-ı mezkûr elli guruşu bana edâya mûmâ-ileyh Mehmed Hilmi Efendi’ye tenbîh olunmak murâdımdır dedikde gıbbe’s-suâl mûmâ-ileyh es-Seyyid Mehmed Hilmi Efendi cevâbında semeni gurre-i şehr-i mübâreke-i mezkûreye müeccel olmak üzere cihet-i mezkûreden ol mikdâr guruş müdde‘î-i mûmâ-ileyh zimmetinde deyni olduğunu tâbi‘an ve kat‘ıyyen ikrâr ve i‘tirâf ve hulûl-i ecel-i mezkûru inkâr edicek müdde‘î-i mûmâ-ileyh Ali Rıza Efendi’den ber-vech-i muharrer müdde‘âsına mutâbık beyyine taleb olundukda udûl-i ahrâr-ı ricâl-i Müslimînden ve İstanbul Bâb Mahkemesi ketebesinden Ali Rıza Efendi b. Ahmed b. Abdullah ve İstanbul Mahkemesi Odacısı Mehmed Ağa b. Yusuf b. Osman meclis-i şer‘de hâzırân olup istişhâd olduklarında fi’l-hakīka işbu Pazar gecesi vakt-i gurûbdan beş dakīka mürûrunda hilâl-i şehr-i şerîf-i mezkûru câmi‘-i şerîf-i mezkûr minâresinden re’yü’l-ayn müşâhede ve rü’yet eyledik deyü her biri vech-i şer‘î üzere edâ-i şehâdet-i şer‘iye ettiklerinde şâhidân-ı mezbûrân evvelâ bâ-varaka-i mestûre İstanbul Bâb Mahkemesi Başkâtibi Ahmed Bahâî Efendi b. Abdülaziz b. Abdullah ve İstanbul Mahkemesi Muhzırlar Kethudâsı Süleyman Efendi b. Ârif b. Abdurrahman’dan sırren ve ba‘dehû alenen lede’t-tezkiye adl ve makbûlü’ş-şehâde idikleri ihbâr olunmağın mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fî-gurreti Ramazan sene [1]291.