İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 155 Hüküm no: 140 Orijinal metin no: [2-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İkinci Abdülhamid tahta geçtiğinden adına hutbe okutulması İstanbul kādısı semâhatlü efendi hazretleri Sultân Murad Han hazretleri cülûslarından berü mübtelâ oldukları illetden ifâkat bulamadıkları cihetle şer‘an mütehalli‘ olduklarından taht-ı âlî-baht-ı Osmânî vâris-i meşrû‘-ı hilâfet-i ulyâ olan şevketlü <> mehâbetlü Sultân Abdülhamid Hân-ı sânî hazretlerinin cülûs-ı meyâmin-me’nûs-ı mülûkâneleri ile teşerrüf ederek bî‘at-ı umûmiye resm-i celîli icrâ olunduğu misillü sünnet-i seniyye-i seyyidü’l-mürselînden ol kırâet-i hutbe kā‘ide-i mübâreke ve müteyemminesinin taraf-ı eşref-i hilâfet-penâhîlerinden bi’l-vekâle îfâ olunması emrinde hutebâ-yı kirâma me’zûniyeti hâvî hatt-ı hümâyûn-ı şevket-meşhûn-ı mülk-dârî şeref-pîrâ-yı sahîfe-i sutûr olmuş ve mantûk-ı münîfi üzere keyfiyet Galata ve Eyüb kādıları ile Üsküdar niyâbetine bildirilmiş olmağla zât-ı semûhîleri dahi keyfiyet-i me’zûniyetlerinin ve esnâ-yı kırâet-i hutbe-i şerîfede nâm-ı nâmî ve ism-i sâmî-i hazret-i pâdişâhînin yâd ve tilâvet olunması husûsunun Dersa‘âdet’de bulunan bi’l-cümle cevâmi‘-i şerîfe hutebâ-yı kirâmına ifâde ve i‘lânına himmet eyleye deyü. Fî 11 Şubat sene [12]93.