İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 168 Hüküm no: 159 Orijinal metin no: [16-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Devlete borcu olarak vefat edenlerin borçlarının terekeden doğrudan alınmayıp vârislerine haber verilerek tahsili Taraf-ı vâlâ-yı Meşîhat-penâhîye Ma‘rûz-ı bende-i dîrîneleridir ki, Mîrîye medyûnen vefât edenlerin deynleri terekesinden evvel be-evvel istifâ olunmak üzere müte‘allik oldukları devâirin iş‘ârı üzerine makām-ı Sadâret’den buyruldu tastîriyle defter-i kassâma kaydettirilmek öteden berü cârî ve mer‘î olup bu dahi matlûbât-ı emîriyenin tahsîlince sâir eşhâs ve efrâd alacaklarına mukaddem tutulmasından neşet eylemekde bulunup hâlbuki şu sûret bi’t-tab‘ deynin sübûtuyla meşrût olmak lâzım gelir iken medyûn-ı müteveffânın veresesine mürâca‘at olunmayarak ve bir gûne sened ve hükme müstenid olmayarak devâirin yalnız iş‘ârı ile âdetâ acze yakın bir mu‘âmelenin icrâsı veresenin mağdûriyetini ve tereke umûrunun ba‘zı mertebe teşvîş ve te’hîrini mûcib ve bundan bir takım şikâyât ve müsted‘iyât tevellüdünü müstevcib olmakda bulunduğu cihetle muvâfık-ı ma‘delet ve maslahat görülemediğinden ba‘demâ mîrîye borcu bulunup da vefât edenlerin zimmetlerinde olan mebâliğin ta‘alluku bulunan dâirelerce doğrudan doğruya vârislerinden taleb ve tahsîl olunması ve vârisler tarafından inkâr veyâ ta‘allül vukū‘unda devâir tarafından vekîl ta‘yîniyle bi’l-mürâfa‘a lâhık olacak hükm-i şer‘î üzerine kemâ-kân evvel be-evvel terekelerinden istifâsı yoluna gidilmesi husûsunun usûl ittihâzı Meclis-i Vükelâ’da tezekkür ve tensîb olunmuş ve bi’l-istîzân irâde-i seniyye-i cenâb-ı pâdişâhîden ol merkezde müte‘allik buyurulup sûret-i hâl lâzım gelenlere bildirilmiş olmağla ba‘de ezîn bu karâra tevfîk hareket etmek üzere Bâb-ı Vâlâ-yı Fetvâ-penâhîlerince iktizâ-yı hâlin îfâsına himmet buyurulması bâbında emr ü irâde hazret-i men-lehu’l-emrindir. Fî selhi Cumâdelâhire sene [1]295 ve fî 19 Haziran sene [12]94. Safvet