İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 309 Hüküm no: 328 Orijinal metin no: [126-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bulgaristan Emareti memurlarınca düzenlenip oradaki Osmanlı memurları tarafından tasdik edilmeyen evrakın mahkeme ve resmi dairelerce kabul edilmemesi uygulamasına son verilmesi Ma‘rûz-ı bende-i dîrîneleridir ki, Mehâkim-i şer‘iye ve nizâmiye ile mukāvelât muharrirliklerinden tanzîm olunan hücec-i şer‘iye ve vesâik-i nizâmiyenin Dersa‘âdet Kapıkethudâlığı’ndan tasdîk olunmadıkça emâret me’mûrları tarafından kaydolunmadığı cihetle Bulgaristan me’mûrları cânibinden tanzîm olunan bi’l-cümle evrâkın dahi emâret dâhilinde bulunan me’mûrîn-i saltanat-ı seniyye tarafından musaddak olmadığı hâlde mehâkim ve devâir-i saltanat-ı seniyye taraflarından kabûl olunmaması lüzûmu Hâriciye Nezâret-i celîlesinin iş‘ârına atfen 4 Haziran sene 307 târihinde ve sırasında savb-ı uhde-i fetvâ-penâhîlerine de yazılmış idi. Ol bâbda taraf-ı âlî-i sadâret-penâhî ile cereyân eden muhâbere cevâbında karâr-ı mezkûr tarafeyn ahâlîsinin mağdûriyetini ve mesâlih-i vâkı‘alarının teahhur-ı tesviyesini müstelzim olmakta idiği anlaşıldığından bu bâbdaki müşkilât ref‘ edilmek üzere karâr-ı mebhûsun icrâsından sarf-ı nazar edilmesi Meclis-i Mahsûs-ı Vükelâca tezekkür ve tensîb kılındığı beyân-ı âlîsiyle icrâ-yı îcâbı emr u izbâr kılınmış ve keyfiyet îcâb eden devâir ile bi’l-umûm vilâyât ve müstakil mutasarrıflıklara bildirilmiş olmağla dâire-i celîle-i meşîhat-penâhîlerince de ona göre iktizâsının îfâsına müsâ‘ade-i aliyye-i fetvâ-penâhîleri şâyân buyurulmak bâbında emr u fermân hazret-i men-lehu’l-emrindir. Fî 18 Receb sene 309 ve fî 5 Şubat sene 307. Nâzır-ı Umûr-ı Dâhiliye Zühdü