İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 323 Hüküm no: 348 Orijinal metin no: [133-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Adliye Nezareti Havale Müdüriyeti’nin daireler ve şer‘iye mahkemelerine ait evrak ve sairenin havalesini yapmaması İstanbul Kādılığı’na, Semâhatlü Efendim Hazretleri, Adliye Nezâret-i Celîlesi Havâle Müdîriyeti tarafından devâir ve mehâkim-i şer‘iyeye âid evrâk ve sâire dahi havâle olunmakta olduğundan ve bu ise intizâm-ı mu‘âmeleyi muhîll idiğinden ba‘demâ devâir ve mehâkim-i şer‘iyeye havâle olunmak lâzım gelen evrâk ve sâirenin müdîriyet-i mezkûre cânibinden havâle olunmayıp taraf-ı senâverî ile meşîhat müsteşârlığı cânibinden tetebbu‘ ve tedkīk olunduktan sonra havâle edilmek üzere makām-ı muhlisîye irsâli şeref-sudûr buyrulan irâde-i seniyye-i hazret-i hilâfet-penâhî iktizâ-yı âlîsinden olup keyfiyet nezâret-i müşârün-ileyhâya dahi teblîğ edildiği Mâbeyn-i Hümâyûn-ı Cenâb-ı Mülûkâne Başkitâbet-i celîlesinden bâ-tezkire-i husûsiye izbâr olunmuş [134] ve ber-mantûk-ı emr ve fermân-ı hümâyûn mu‘âmele icrâsı mukarrer bulunmuş olmağla ve keyfiyetin taraf-ı semûhîlerinden mehâkim-i mülhaka niyâbetlerine teblîği lâzımeden bulunmağla berây-ı ma‘lûmât tezkire-i sitâyişverî terkīm kılındı efendim. Fî 11 Cemâziyelâhire sene 1314 ve fî 5 Teşrîn-i sânî sene 1312. Şeyhülislâm Mehmed Cemaleddin