İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 330 Hüküm no: 358 Orijinal metin no: [140-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhacirlerin iskan masraflarına karşılık olmak üzere bazı evrak, senet ve saireye yapıştırılacak pullardan elde edilen hasılatın suistimalden korunması Bâb-ı Âlî Dâire-i Sadâret-i Uzmâ Mektûbî Kalemi Aded: 88 Taraf-ı Vâlâ-yı Hazret-i Meşîhat-penâhî’ye, Ma‘rûz-ı bende-i dîrîneleridir ki, Muhâcirînin mesârif-i iskâniyelerine karşılık tutulmak ve iki seneye munhasır olmak üzere bazı evrâk ve senedât ile sâireye derecât-ı muhtelifede pul ilsâkı ve bu sûretle hâsıl olacak vâridâtın her gûne sû-i isti‘mâlden vikāyesi zımnında cibâyeti maddesinin Dersa‘âdet’de Mâliye Nezâreti’nin ve vilâyâtda defterdârların taht-ı nezâret ve mesûliyetine vaz‘ı ve pulların taklîd olunmayacak ve el-yevm isti‘mâl olunan sâir pullardan tefrîk olunacak bir şekil ve sûretde tab‘ ettirilmesinin nezâret-i müşârün-ileyhâya teblîği ve müteferri‘âtı hakkında Şûrâ-yı Devlet-i Mülkiye Dâiresi’nden tanzîm olunan mazbata ve cedvel Meclis-i Mahsûs-ı Vükelâ’da lede’l-kırâ’e muhâcirîn-i merkūmenin tesrî‘-i iskânları nezd-i merâhim-vefd-i âlîde matlûb ve mültezim olup bu yolda ihtiyârı zarûrî olan mesârife açıkdan bir karşılık bulunması emr-i iskânı teshîl edeceğine mebnî mesârif-i mezkûreye kısmen karşılık tutulmak ve iki seneye munhasır olmak üzere evrâk ve senedât-ı mezkûre ile sâireye derecât-ı muhtelifede pul ilsâkı münâsib ve muvâfık olup ancak ruhsatla te’sîs olunacak ufak fabrikalardan beşer lira ve imtiyâzlı şirketlerin sermâyelerinden binde yarım nisbetinde bir şey ve beş yüz guruşdan i‘tibâren maâş senedâtından bir guruş alınması mazbata-i mezkûrenin cümle-i münderecâtından ise de sâlifü’z-zikr fabrikalar küçük şeyler olması cihetiyle beş lira ziyâde göründüğünden bunlardan birer lira ve maâş senedâtından alınacak bir guruşun bin guruşdan i‘tibâren ahzı ve zikrolunan şirketlerin ba‘de-ezîn teessüs edecek şirketler yolunda takyîdi ve ihâle olunacak ma‘den imtiyâzlarının fermân-ı âlîlerinin hîn-i i‘tâsında derece-i cesâmet ve servetine göre yüz liradan yüz elli liraya kadar resm istihsâli husûsuna meclis-i mahsûs-ı mezkûr karârıyla bi’l-istîzân irâde-i seniyye-i cenâb-ı hilâfet-penâhî müte‘allik ve şeref-sudûr buyrularak sâlifü’z-zikr cedvelin bir sûret-i tashîha-i matbû‘ası leffen taraf-ı âlî-i meşîhat-penâhîlerine isrâ ve bi’l-cümle devâir-i merkeziyeye teblîgāt icrâ kılınmağla dâire-i celîle-i meşîhat-penâhîlerince dahi îfâ-yı muktezâsı bâbında emr u irâde hazret-i men-lehu’l-emrindir. Fî 24 Safer sene 317, fî 21 Haziran sene 315. Sadrıa‘zam Rıfat