İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 415 Hüküm no: 458 Orijinal metin no: [185-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden memurlar ile devlete hizmet edenlerdeki nişanların vârislerinden alınması Bâb-ı Âlî Dâire-i Sadâret 534 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, Me’mûrîn ve müstahdemîn-i devletden vefât edenlerin hâmil oldukları Osmânî ve Mecîdî nişânlarının usûl ve nizâmına tevfîkan veresesi cânibinden i‘âde edilip edilmediği sandıkdan müstahakk-ı maâş olan efrâd-ı âilesinden tahkīk ve vârisleri nezdinde kaldığı tebeyyün edenler bi’l-istirdâd tesyîr edilmekde ise de sandıkca bi-hakkın ta‘kīb ve muhâfaza edilemeyen şu usûlün yalnız ma‘rûf olanlar hakkında tatbîki ve diğerlerinin bundan istisnâsı hukūk-ı hazînenin muhâfazasına ma‘tûf olan maksad-ı aslîyi tamamen te’mîn edememekde olduğundan ba‘de-ezîn ilmî ve askerî sandıklarınca da hîn-i tahsîs-i maâşâtda tatbîkātına i‘tinâ olunmak ve müstahakk-ı maâş âilesi olmadığı hâlde vefât edenlere âid nişânların dahi Hazîne-i Beytü’l-mâl İdâresince istirdâdı çâresi te’mîn edilmek üzere gerek merkez gerek taşraca tahsîs-i maâşâta esâs olan müddet-i hizmet cedvellerinin hîn-i tanzîminde sicil varakalarına dahi bi’l-mürâca‘a vefât edenlerin uhdelerindeki nişânların âilelerinden bi’l-istirdâd mukābilinde makbûz senedi i‘tâsı ve Bâb-ı Âlî’ye li-ecli’l-isrâ veznelerce ve mâl sandıklarınca bir defter-i mahsûsa kaydıyla keyfiyetin mezkûr cedvellerin mülâhazât hânelerine işâret olunması Mütekā‘idîn ve Ma‘zûlîn-i Mülkiye Sandıkları Nezâret-i Behiyyesi’nin iş‘ârı üzerine bi’t-tensîb ta‘mîmen teblîgāt icrâ kılınmağla Dâire-i Celîle-i İlmiyece de ona göre iktizâsının îfâsına himmet buyurulması bâbında emr u irâde hazret-i men-lehu’l-emrindir. Fî 26 Zilka‘de sene 1327 ve fî 26 Teşrîn-i sânî sene 1325. Sadrıa‘zam Hüseyin Hilmi