İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 422 Hüküm no: 468 Orijinal metin no: [189-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Doktor Muhyiddin Bey’in başkanlığında Müessesat-ı Hayriye-i Sıhhiye teşkilatının kurulması Dâhiliye Nezâreti’nden 362 Hülâsa: Müessesât-ı Hayriye-i Sahîha’nın [Sıhhiye’nin] sûret-i teşekkülü hakkında. Huzûr-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, Münâsebât-ı medeniye ve mu‘âmelât-ı iktisâdiye îcâbâtından olarak memâlik-i Ecnebiye ile vukū‘ bulan ihtilâtından dolayı Dersa‘âdet ahvâl-i sıhhiyesinin kesb ettiği ehemmiyet nazar-ı dikkate alınarak envâ‘-ı emrâz-ı müstevliyenin te’sîrât-ı muhribesinin kesr ü izâlesi ve sıhhat ve selâmet-i umûmiyenin te’mîn-i muhâfazası için pây-ı tahtda bulunan müessesât-ı sıhhiyenin terakkiyât-ı fenniyeye tevfîkan ıslâh ve tanzîmlerine nezâret etmek ve şehremâneti meclis a‘zâsından Doktor Muhyiddin Bey’in taht-ı riyâsetinde bulunmak üzere müessesât-ı sıhhiyeye mensûb mütemeyyizân-ı me’mûrîn ve etibbâdan mürekkeben “Müessesât-ı Hayriye-i Sıhhiye” nâmıyla bir idâre teşkîl ve emânet-i müşârün-ileyhâya merbût hastahâne ve müessesât-ı sıhhiye ve sâire idârelerinin de bu müesseseye rabtı ve teferru‘âtı Şûrâ-yı Devlet Mâliye Dâiresi’nin fî 26 Receb sene 1327 ve fî 3 Temmuz sene 1325 târihli buyruldu-yı sâmî ile teblîğ olunan karârı iktizâsından olduğu hâlde emânet-i müşârün-ileyhânın sûret-i iş‘ârına nazaran bazı devâirin müessese-i mezkûrenin teşekkülünden bî-haber olduğu anlaşıldığından ta‘alluk eden mevâd hakkında doğrudan doğruya bu idâreye mürâca‘at edilmek ve bu bâbda bir gûne müşkilât ve teahhurâta meydân verilmemek üzere umûm devâir-i merkeziyeye beyân-ı ma‘lûmât ve icrâ-yı teblîgāt olunmuşdur, taraf-ı âlî-i fetvâ-penâhîlerince de ona göre îfâ-yı mu‘âmeleye himmet buyurulması bâbında emr u fermân hazret-i men-lehu’l-emrindir. Fî 20 Şevval sene 1327 ve fî 22 Teşrîn-i evvel sene 1325. Dâhiliye Nâzırı Nâmına Müsteşâr Fuad