İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 424 Hüküm no: 470 Orijinal metin no: [189-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bosna muhacirlerinin memleketlerindeki arazi ve emlakinin ferağı için tanzim edecekleri vekalet hüccetlerinin pul resminden istisnası Sadâret’den 160 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, Bosna muhâcirlerinin memleketlerindeki arâzî ve emlâkinin ferâğı için tanzîm edecekleri vekâlet hüccetlerinin pul resminden müstesnâ tutulup tutulmayacağı Mâliye Nezâret-i Aliyyesi’nden lede’l-istifsâr alınan cevâbda Damga Resmî Kānûnu’nun yirmi yedinci maddesinin otuz sekizinci fıkrasında muhâcirînin müddet-i ma‘füviyet-i nizâmiyeleri tarafından memleketlerindeki emvâl-i gayr-ı menkūleleri hakkında tanzîm edecekleri vekâletnâmelerin pul resminden müstesnâ tutulması lâzım geleceği musarrah olmasına nazaran Bosna muhâcirleri için de bir müddet-i ma‘füviyet [190] ta‘yîn edilmiş olduğu hâlde bu müddet zarfında hükm-i istisnâiyeden istifâde etmeleri tabî‘i olduğu gösterilmiş ise de muhâcirîn-i mezkûre için müddet-i ma‘füviyet ta‘yîn edilip edilmediği Fetvâhâne-i Âlîce gayr-ı ma‘lûm bulunduğu beyânıyla keyfiyetin inbâsı lüzûmunu mutazammın ve Şûrâ-yı Devlet’e muhavvel 17 Ağustos sene 325 târihli ve yetmiş bir numaralı tezkire-i aliyye-i meşîhat-penâhîleri üzerine Tanzîmât Dâiresi’nden i‘tâ kılınan mazbatada Damga Resmî Kānûnu’nun sâlifü’z-zikr yirmi yedinci maddesinde muhâcirîne bu bâbda bahş olunan ma‘füviyet mutlak olarak zikredilmiş ve Bosna ve Hersek kıt‘asının Avusturya’ya terkine kadar gelen muhâcirîn dahi ma‘füviyete mazhar olmuş olmasına nazaran ba‘de’t-terk av[d]et edecek muhâcirîn hakkında ma‘füviyet mu‘âmelesinin icrâsı tabî‘i olduğunun cevâben taraf-ı âlî-i meşîhat-penâhîlerine izbârı tezekkür olunduğu dermeyân kılınmağla ona göre îfâ-yı muktezâsı bâbında emr u irâde hazret-i men-lehu’l-emrindir. Fî 18 Ramazan sene 327 ve fî 20 Eylül sene 325. Sadrıa‘zam Hüseyin Hilmi