Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 84 Hüküm no: 55 Orijinal metin no: [14b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Adalar nahiyesi yeniçeri serdarının görevden alınarak yerine kırk dördüncü bölükden Mustafa'nın tayini Şerî‘at-şi‘âr Adalar nâhiyesi kādîsı efendi tahiyyât-ı sâfiyât ithâfından sonra muhibbâne inhâ olunur ki, taht-ı kazânızda vâki‘ yeniçeri serdârı ref‘ olunup yerine üslûb-ı sâbık üzere kırk dört bölüğün Mustafa nâm yoldaş nasb u ta‘yîn olunmağın işbu mektûb tahrîr ve irsâl olunmuşdur, vusûlünde gerekdir ki mezbûru serdârlığı umûrunda istihdâm edip âharı [dahl] etdirmeyesiz ve ol cânibde vâki‘ yeniçeri ve cebeci ve topçu ve gılmân-ı acemî ve kuloğulları merkūmu üzerlerine serdâr ve zâbit bilip sözünden taşra ve re'yinden hâric vaz‘ u hareket etmeyip itâ‘at ve inkıyâd üzere olalar ve tevâif-i mezbûrdan bilâ-vâris-i ma‘rûf fevt olanların muhallefât ve metrûkâtlarını ma‘rifet-i şer‘le mezbûra ahz u kabz ve sûk-ı sultânîde fürûht etdirdip hâsıl olan nükūdu mümzâ ve mahtûm müfredât defterleriyle bu cânibe irsâl etdirile ve lâkin hilâf-ı şer‘ ve kānûn bir ferde rencîde ve remîde etdirilmeye, bâkī hemîşe eyyâm-ı şerî‘at efzûn bâd. Tahrîren evâil-i şehr-i Zilhicceti’ş-şerîfe sene ışrîn ve mi'e ve elf. Mustafa Ağa-yı Yeniçeriyân-ı Dergâh-ı Âlî hâlâ.