Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 84 Hüküm no: 57 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski Yeniçeri Kâtibi Yeğen Mustafa'nın Karaaliler köyündeki korusuna Kurd, Şeyhli, Kurna ve Kavaklı köyleri ahalisince yapılan müdahalenin önlenmesi Kıdvetü’n-nüvvâbi’l-müteşerri‘în Adalar nâhiyesinde nâibü’ş-şer‘ olan Mevlânâ ( ) -zîde ilmuhû- tevkī‘-i refî‘-i hümâyûn vâsıl olıcak ma‘lûm ola ki, sâbıkā yeniçeri kâtibi olan dârende-i fermân-ı vâcibü’l-iz‘ân kıdvetü’l-emâcid ve’l-a‘yân Yeğen el-Hâc Mustafa -zîde mecdühû- südde-i sa‘âdetime arzuhâl edip nâhiye-i mezbûra tâbi‘ Karaaliler nâm karyede vâki‘ mutasarrıf olduğu çiftliğin resimlü ve temessüklü mahsûs ve müstakıl korusu yerlerinde âharın bir vechile alâkası yoğiken yine nâhiye-i mezbûra tâbi‘ Kurd ve Şeyhli ve Kurna ve Kavaklı ( ) nâm karye ahâlîlerinden bazıları mahsûs ve resimlü korusunun fuzûlî ve kadîme mugāyir eşcârın kat‘ ve iskelelerine indirip fürûht edip ta‘addî eylediklerin bildirip kadîme mugāyir ta‘addîleri men‘ u def‘ olunmak bâbında emr-i şerîfim ricâ eylediği ecilden buyurdum ki, hükm-i şerîfimle mûmâ-ileyhin âdemîsi vardıkda husûs-ı mezbûra tamâm hak üzere mukayyed olup göresin, nizâ‘ olunan mahâll-i mezbûrlar ve herkesin odun ve sâir kereste kat‘ edegeldikleri mübâh dağlardan olmayıp fi’l-vâki‘ mûmâ-ileyhin mutasarrıf olduğu çiftliğin resimlü ve temessüklü mahsûs ve müstakıl korusu yerleri iken mezbûrlar kadîme mugāyir fuzûlî eşcârın kat‘ ve iskelelerine indirip âhara fürûht eyledikleri vâki‘ ise vech-i meşrûh üzere olan korusu yerlerinde mezbûrları ve âharı kadîme mugāyir fuzûlî eşcârın kat‘ etdirmeyip min-ba‘d kānûna ve kadîme ve emr-i hümâyûnuma muhâlif ta‘addîlerin men‘ u def‘ edesin, eslemeyip inâd ve muhâlefet üzere olanları ism ü resmleriyle vukū‘u üzere yazıp Âsitâne-i sa‘âdetime arz ü i‘lâm edip husûs-ı mezbûr içün bir dahi emrim varmalı eylemeyesin, şöyle bilesin, alâmet-i şerîfe i‘timâd kılasın. Tahrîren fî-evâhiri şehri Rebî‘i’l-âhir sene hamse ve ışrîn ve mi'e ve elf. Kazâ-i Adalar, saman kantar, 60 akçe el-Hâc Ebubekir Ağa Yeniçeriyân-ı Dergâh-ı âlî. (Mühür)