Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 91 Hüküm no: 69 Orijinal metin no: [17b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Soğanlık köyünden Ali b. Mehmed'in Togodoş'a sattığı bezir yağhanesi bedelini aldığı Medîne-i Üsküdar’a muzâfe Adalar nâhiyesine tâbi‘ Soğanlık nâm karye sâkinlerinden el-Hâc Ali b. el-Hâc Mehmed nâm kimesne meclis-i şer‘-i hatîr-i lâzımü’t-tevkīrde işbu bâ‘isü’s-sifr Togodoş v. Siyopkato? nâm zimmî muvâcehesinde ikrâr ve takrîr-i kelâm edip bundan esbak mersûm Togodoş yedimden iştirâ ve kabz ve tesellüm eylediği yine nâhiye-i mezbûreye tâbi‘ Pendik nâm karyede vâki‘ bir bâb bezir revganhânesi ve dâhilinde bir şîruganhâne bahâsı olmak üzere zimmetinde hakkım olan yedi yüz otuz guruşu mersûmun yedinden bi’t-tamâm ve’l-kemâl ahz u kabz edip zikri mürûr eden bezir revganhânesi ve şîruganhâne bahâsından mersûmun zimmetinde bir akçe ve bir habbe hakkım bâkī kalmamışdır dedikde mersûm Togodoş merkūm el-Hâc Ali’yi cemî‘ kelimât-ı meşrûhasında vicâhen tasdîk ve şifâhen tahkīk etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâdis min-Cumâdelûlâ li-sene ihdâ ve ışrîn ve mi'e ve elf. Şuhûdü’l-hâl: Mehmed Ağa b. Mustafa Zâbit-i karye-i Pendik, Mustafa Ağa b. Abdullah Zâbit-i karye-i Soğanlık, Ali b. Ahmed, İmâm Mehmed Efendi b. Musli der-karye-i Yayalar, Ali Beşe b. Hasan, Abdi Beşe b. İbrahim, Ali Beşe b. Hızır der-karye-i Yakacık, Ahmed Beşe b. el-Hâc İlyas an-karyei Dolayoba ve gayruhum.