Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 128 Hüküm no: 132 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Adalar nahiyesi yeniçeri serdarının görevden alınarak yerine kırk dördüncü bölükten Kara Mustafa'nın tayini Şerî‘at-şi‘âr Adalar nâhiyesinde nâib-i şer‘î olan efendi tahiyyât-ı sâfiyât ithâfından sonra muhibbâne inhâ olunur ki, taht-ı kazânızda vâki‘ yeniçeri serdârı ref‘ olunup yerine üslûb-ı sâbık üzere kırk dört bölükden Kara Mustafa nâm yoldaş nasb ü ta‘yîn olunmuşdur, yedine işbu mektûb tahrîr ve irsâl olundu, vusûlünde gerekdir ki mezbûru serdârlığı umûrunda istihdâm edip âharı dahl etdirmeyesiz ve ol cânibde vâki‘ yeniçeri ve cebeci ve topçu ve gılmân-ı acemî ve kuloğulları mezbûru üzerlerine serdâr ve zâbit bilip sözünden taşra ve re'yinden hâric vaz‘ [u] hareket etmeyip ve itâ‘at [ve] inkıyâd üzere olup ve tevâif-i merkūmeden bilâ-vâris-i ma‘rûf [ve] ma‘rûfe fevt olanların muhallefâtın ve metrûkâtın ma‘rifet-i şer‘le ahz u kabz etdirip ve sûk-ı sultânîde fürûht etdirip hâsıl olan nükūdu mümzâ ve mahtûm defteriyle bu cânibe irsâl etdirdesiz ve lâkin hilâf-ı şer‘ ve kānûn bir ferde rencîde ve remîde etdirmeyesiz ve’s-selâm. Tahrîren fî-evâsıtı Saferi’l-hayr sene 1122 Mustafa Ağa-yı Yeniçeriyân-ı Dergâh-ı âlî hâlâ.