Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 129 Hüküm no: 134 Orijinal metin no: [29a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden Râbia'nın evini Yunus Beşe'ye satması Medîne-i Üsküdar muzâfâtından Adalar nâhiyesine tâbi‘ Kartal nâm karye sâkinlerinden Râbia bt. Hüseyin nâm hatun meclis-i şer‘-i şerîf-i enver[de] işbu hâfizü’l-kitâb Yunus Beşe b. Mustafa nâm kimesne mahzarında ikrâr-ı tâm ve takrîr-i kelâm edip karye-i mezbûrda Osmancık mahallesi nâm mevzi‘de vâki‘ ba‘zen bir tarafı bâyi‘-i merkūm menzili ve ba‘zen Ahmed Beşe bahçesi ve bir tarafı ba‘zen Müstecib menzili ve ba‘zen Râbia Hatun’un menziline müntehî tarîk-i hâs ve iki tarafdan tarîk-i âm ile mahdûd bir bâb fevkānî oda ve bir sofa ve bir ahır ve kenîf ve havluyu müştemil mülk menzilini cemî‘ tevâbi‘ ve levâhıkıyla mezbûr Yunus Beşe’ye otuz guruşa bey‘ ve teslîm edip ol dahi minvâl-i muharrer üzere iştirâ ve tesellüm ve temellük eyledikden sonra semeni olan meblağ-ı mezbûru tamâmen ahz u kabz eyledim, ba‘de’l-yevm menzil-i mahdûd-ı mezkûr mezbûr Yunus’un mülk-i müşterâsıdır. Tahrîren fi’l-yevmi’r-râbi‘ min-Rebî‘ülevvel li-sene isnâ ve ışrîn ve mi'e ve elf. Şuhûdü’l-hâl: İbrahim Çelebi b. Mehmed, Hüseyin Beşe b. Mehmed, Ebubekir Beşe b. Halil, el-Hâc Ali Ağa, İsmail Efendi, Monlâ Mehmed, Hasan Çelebi.