Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 138 Hüküm no: 151 Orijinal metin no: [32b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Donanma için Kereste Emini İbrahim Ağa mübaşeretiyle inşa olunan filikalara gemici tayini Der-i devlet-mekîne arz-ı dâ‘î-i kemîne oldur ki, Hadîka-i Hâssa bostanîleri hasekilerinden kıdvetü’l-emâsil ve’l-akrân Mehmed Haseki -zîde kadruhû- Üsküdar’a tâbi‘ Adalar kazâsından Kartal’a gelip yedinde olan fermân-ı âlîşânın mefhûm-ı münîfinde inşâallâhu te‘âlâ Bahr-ı Siyah tarafına giden Donanma-yı hümâyûn içün Adalar nâhiyesinden Kereste Emîni İbrahim Ağa mübâşeretiyle mücedded inşâ olunan filika sefineleri içün yüz yirmi bir nefer gemici ihrâc ve iktizâ eden ücretleri emîrü’l-ümerâ bi’l-fi‘il kapudan paşa hazretlerinin yedinden verilip sûret-i defter mûcebince ta‘yîn olunan mahallerden memûr oldukları mahalle teslîm ve illâ henüz ihrâc olunmamış ise bundan sonra bir an tevakkuf eylemeyip sûret-i defter mûcebince bi-eyyi hâlin ihrâc ve fermân olunan mahalle îsâl ve irsâlde ziyâde dikkat ve ihtimâm eyleyesiz deyü buyurulmağın bundan akdem mübâşir ta‘yîn buyurulan Murad Ağa’nın yedinde olan fermân-ı âlîşânda tasrîh olunduğu üzere Adalar kazâsından <> tâbi‘ Kartal’dan matlûb olan on nefer gemici cem‘ ve her birine aylık ücretlerin mübâşir-i merkūm Murad Ağa yedinden ahz u kabz ve yarar kefillerin alıp fermân-ı âlî buyurulduğu üzere mübâşir-i merkūm Murad Ağa ma‘rifetiyle filikalar binâsına memûr Kereste Emîni İbrahim Ağa’ya teslîm olunduğu bi’l-iltimâs der-i devlete i‘lâm olundu. Hurrire fî-Saferi’l-hayr li-sene selâse ve ışrîn ve mi'e ve elf.