Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 145 Hüküm no: 178 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakacık köyü ağası Mustafa Ağa'nın kaybolmuş olan Abdullah'ın bulunmasını köy halkından talebi Üsküdar kazâsı muzâfâtından Adalar nâhiyesi tevâbi‘inden Yakacık Ağası Mustafa Ağa nâm kimesne meclis-i şer‘de karye-i mezkûre ahâlîleri üzerine da‘vâ ve takrîr-i kelâm edip gāib olan Abdullah bu karyede sizin mâbeyninizde gāib oldu, karye ağası olduğum hasebiyle taleb ederim, suâl olunup takrîrleri tahrîr olunmak matlûbumdur dedikde gıbbe’s-suâl mezbûrlar cevâbında bizler bilmeziz ve lâkin Tufanoğlu Mustafa ve Kürd Ahmed ikisi katl eyledi deyü istimâ‘ etdik dedikleri kayd şüd. Tufanoğlu Mustafa ve Kürd Ahmed’e suâl olund[u], inkâr ile cevâb verip müdde‘î beyyineden ba‘de’l-acz halfden sonra men‘ olunduğu kayd şüd. Şuhûdü’l-hâl: İsmail Çelebi sâkin-i Soğanlık, Hasan b. Hızır sâkin-i İstanbul, Hüseyin Cenani? sâkin-i Soğanlık, Mehmed Ağa Mühürdâr b. Varak, Hasan Beşe sâkin-i Soğanlık, Mehmed Beşe b. Ahmed, Mehmed b. Ahmed sâkin-i Edirne, Mehmed b. Ahmed sâkin-i İstanbul, Mustafa Çelebi b. Musa sâkin-i İstanbul.