Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 197 Hüküm no: 290 Orijinal metin no: [51b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pendik'te ölen Despinos varislerinin haklarını aldıkları Medîne-i Üsküdar’a muzâfe Adalar nâhiyesine tâbi‘ Pendik karyesinde sâkine iken bundan akdem hâlike olan Despinos hâlikenin verâseti zevc-i metrûku Yorgi zimmî ile er karındaşı Kara Nikoli zimmî ile ve kız karındaşı Tomas Nasrâniyeye münhasıra olduğu şer‘an mütehakkık oldukdan sonra mesfûrân Yorgi ve Kara Nikoli zimmîler meclis-i şer‘-i hatîr-i lâzımü’t-tevkīrde işbu bâ‘isetü’s-sifr mesfûre Tomas Nasrâniye tarafından vekîl-i müsecceli zevci Todori v. Lakray? mahzarında her biri ikrâr-ı tâm ve takrîr-i kelâm edip mûrisimiz hâlike-i mesfûreden bizlere şer‘an intikāl ve isâbet eden hisse-i şer‘iyemizi defter-i kassâm mûcebince müvekkil-i mesfûr Todori zimmî yedinden bi’t-tamâm ahz u kabz eyledik, hâlike-i mesfûrenin eşyâ-i metrûkesine müte‘allika defter-i kassâm nâtık olduğu üzere müvekkile-i mesfûrenin zimmetini ibrâ-i âm ve kātı‘u’n-nizâ‘la iştirâ ve ıskāt eyledik dediklerinde mâ-hüve’l-vâki‘.