Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 204 Hüküm no: 306 Orijinal metin no: [54b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Davarlar için gerekli olan samanın toplanarak gönderilmesi Mefâhirü’l-emâsil ve’l-akrân Gekbüze ve Adalar ve Yoros ve Taşköprü ve İznikmid ve Karamürsel ve Yalakâbad ve Pazarköyü ve İznik ve Gemlik ve Mudanya ve Kazıklı kazâlarında vâki‘ yeniçeri serdârları -zîde kadruhum- inhâ olunur ki, senede bir kere davarlarımız için askerî tâifesi mu‘tâd-ı kadîm üzere veregeldikleri samanın cem‘ ve tahsîlinin vakt ü zamânı hulûl etmekle tarafımızdan irsâl olunan memhûr defter-i nâtık mûcebince kazâlarınızda olan askerî tâifesinde ve kuloğullarından sene-i sâbıkda olageldiği üzere tahsîl ve tarafımıza getirilmek için işbu mektûbu tahrîr ve ve yedinci bölüğün kapı kethüdâsı Ahmed nâm yoldaş ta‘yîn ve irsâl olunmuşdur. Vusûlünde siz ki yeniçeri serdârlarısız, vech-i meşrûh ve sene-i sâbık üzere davarlarımız için beher sene askerî tâifesi ve kuloğullarının veregeldikleri samanı irsâl olunan memhûr ve ma‘mûlün-bih defter mûcebince zikr olunan kazâlarınızda olan askerî tâifesinden ve sahîh kuloğullarından ta‘yîn olunan mübâşir ma‘rifetiyle vaz‘-ı kadîm üzere tahsîl ve tarafımıza irsâl olunup avk u tehîr ve ihmâl ve müsâmahaya cevâz göstermeyip ve lâkin bu bahâne ile askerî tâifesinden olmayan re‘âyâ tâifesinden bir akçe ve bir habbe talebinde olmayıp dirlikde alâkası olmayanlardan hilâf-ı kānûn bir habbelerin almayıp ve aldırmayıp mûceb-i mektûb ile âmil ve hilâfından gāyetü’l-gāye hazer eyleyesiz ve’s-selâm. Tahrîren evâil-i şehr-i Rebî‘i’l-âhir sene isnâ ve ışrîn ve mi'e ve elf. Mustafa, Ağa-yı Yeniçeriyân-ı Dergâh-ı âlî hâlâ. Kazâ-i Adalar, 60 kantar saman, yalnız altmış kantardır.