Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 208 Hüküm no: 318 Orijinal metin no: [56a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tarandafil'in Mehmed'i yaraladıkdan sonra bıçakla kendini öldürdüğü Medîne-i Üsküdar’a muzâfe Adalar nâhiyesine tâbi‘ Tuzla nâm karye subaşısı olan Ahmed Ağa b. Mehmed Ağa nâm kimesne meclis-i şer‘-i şerîf-i enverde takrîr-i kelâm ve ta‘bîr ani’l-merâm edip târîh-i kitâbdan bir gün mukaddem karye-i mezbûre kurbünde Adamanastır nâm mevzi‘de sârık olmak üzere ahz ve habs eylediğim Gekbüze kazâsına tâbi‘ Darıca nâm karye ahâlîsinden Tarandafil v. Manolaki nâm zimmî kendü hizmetkârım Mehmed b. Osman nâm kimesnenin yanından bıçağın ahzedip ve sağ koltuğunun altından darb ve mecrûh eyledikden sonra yine ma‘hûd bıçağı alenen ahâlî-i karye mahzarlarında kendü boğazına sokup kendü kendünü dahi katl etmeğin kıbel-i şer‘den üzerine varılıp keşf ve tahrîr olunmak matlûbumdur dedikde, taraf-ı şer‘-i enverden bu fakīr ve zeyl-i vesîkada mastûrü’l-esâmî olan Müslimûn ile karye-i mezbûra varılıp evvelâ subaşı-yı mezbûrun hizmetkârı Mehmed’in eser-i cerâhatine nazar olundukda fi’l-hakīka sağ kolunun altında bıçak yarası olduğu ba‘de’l-mu‘âyene hâlik-i mesfûr Tarandafil nâm zimmînin dahi eser-i cerâhatine dahi nazar olundukda boğazında bıçak yarası olduğu mu‘âyene ve müşâhede olundukdan sonra husûs-ı mezbûr ahâlî-i karye-i mezbûreden suâl olundukda İbrahim Beşe b. Mehmed ve Ahmed b. Mehmed ve İbrahim Reis b. Hasan ve İsmail Çelebi b. İbrahim nâmûn kimesneler meclis-i şer‘a hâzırûn olup her biri cevâblarında fi’l-hakīka hâlik-i mesfûr Subaşı Ahmed Ağa’nın hizmetkârı Mehmed’in yanından bıçağı ahz ve sağ koltuğunun altından darb ve mecrûh eyledikden sonra yine ma‘hûd bıçağı kendü boğazına sokup kendü kendünü alenen katl eyledi deyü her biri alâ-tarîkı’ş-şehâde haber vermeleri ile işbu vesîka alâ-mâ-hüve’l-hakīka gıbbe’t-taleb ketb olundu. Tahrîren fi’l-yevmi’l-hâmis ve’l-âşir şehri Cemâziyelevvel li-sene erba‘a ve ışrîn ve mi'e ve elf. Şuhûdü’l-hâl: Mehmed Beşe b. Ali, İsmail Beşe b. İbrahim, Ali Beşe b. İbrahim, İbrahim Çelebi b. Mustafa, Ahmed Çelebi el-müezzin, Ahmed Efendi imâm-ı karye-i mezbûr, İbrahim Reis b. Hasan, İbrahim b. Aydın, Halil Beşe b. Sefer, Ali Beşe b. Abdullah, Hüseyin Beşe b. Ali, Ramazan Beşe b. Abdullah, Ahmed b. Abbas, Mehmed b. Şa‘bân, Hüseyin Beşe b. Şa‘bân, Mehmed Beşe b. Veli, Abdi Beşe b. Musa, Süleyman Beşe b. Abdullah, en-nâib-i bi-nâhiyeti Adalar, İbrahim Reis b. Hasan, Nakkaş Ahmed b. Mehmed sâkin-i İstanbul, İbrahim Beşe b. Mehmed Karamürselî, Ali b. Mehmed, Mehmed b. Abbas.