Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 210 Hüküm no: 320 Orijinal metin no: [57a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Paşa Sarayı Evkafı'na ait evi fuzuli olarak elinde bulunduran zimmiden vakıf parasının tahsili Vakf-ı mezbûr müfettişi efendi şer‘le göresin deyü buyuruldu. Devletlü ve merhametlü sultanım hazretleri sağ olsun, sa‘âdetlü semâhatlü şeyhülislâm sellemehü’s-selâm hazretlerinin taht-ı nezâretlerinde vâki‘ İbrahim Paşa Sarayı Evkāfı’ndan Kartal’da sâkin Kara Serkizoğulları Kirkor ve Mardiros zimmîler zimmetlerinde Sahak zimmî kefâletiyle aslen ve icâreten yüz otuz guruş mâl-ı vakf mukābelesinde bu kadar seneden beri tevâtür ile istiğlâl olup yedimizde bir kaç aded istiğlâl hüccetleri ve hâliyâ mülknâmesi dahi bizde olmağla (°) nâm zimmî menzil-i mezbûru fuzûlî zabt ve tasarruf edip ben akçem ile satın aldım deyü menzil-i mezbûru vakfa teslîmde ta‘allül ve muhâlefet eyleyip gadr murâd eder, mercûdur ki nâzır-ı vakf fazîletlü müfettiş efendi hazretleri huzûrunda mesfûr zimmî ile mürâfa‘a-i şer‘ olup menzil-i mezbûru vakf için ahzolunup taraf-ı sa‘âdetlerine vukū‘u üzere i‘lâm eylemeleri bâbında emr ü fermân merhametlü sultanım hazretlerinindir. Bende: Abdullah Mütevellî-i vakf. İ‘lâmı mûcebince tahsîl olunmak buyuruldu. Ma‘rûz-ı dâ‘îleridir ki, Arzuhâl sâhibi mütevellî Abdullah Çelebi kulları Kirkor ve Mardiros nâm zimmîlerden mütevellî olduğu vakfın mâlından yüz yirmi üç bir rub‘ da‘vâ ve mukābelesinde istiğlâl etdikleri menzilin hüccetin ibrâz eyledikde mesfûrândan suâl olunup münkirler olmağla mazmûnu isbâtdan sonra meblağ-ı mezbûr, mesfûrândan şer‘an tahsîl olunmak lâzım geldiği huzûr-ı âlîlerine i‘lâm olundu. Bâkī fermân men-lehü’l-emrindir. Fî 13 Şevvâl sene 1123