Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 253 Hüküm no: 389 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah'ın Kartal'a yasakçı tayin edildiği İzzetlü ve fazîletlü Kartal kādısı efendi hazretlerinin huzûr-ı şerîflerine Dürer-i da‘avât-ı hâlisa ithâfından sonra inhâ-yı muhibbânemiz budur ki, hâlâ taht-ı hilâfetinizde vâki‘ yasakçı olan yoldaş ref‘ olunup yerine üslûb-ı sâbık üzere Dergâh-ı âlî yeniçerilerinden on dört sekbânların Abdullah nâm yoldaşı kazâ-i mezbûrede yalnız iki değnek verilip yasakçı nasb ü ta‘yîn olunmağın işbu mektûb tahrîr ve irsâl ve iz ve huzûrları kılındı, vusûlünde gerekdir ki, merkūmu yasakçılık umûrunda istihdâm edip âhardan bir ferdi dahl ü ta‘arruz etdirmeyip düşen husûsunda bi-hasebi’ş-şer‘ ve’l-kānûn her vechile imdâd ve i‘ânet edip ve lâkin hilâf-ı şer‘-i şerîf bir kimesneyi rencîde vü remîde etdirmeyesiz. Bâkī ilm ü fazîlet dâim bâd. Tahrîren fî-gurreti Cemâziyelûlâ sene seb‘a ve ışrîn ve mi'e ve elf. Mine’l-fakīr Mehmed, Kethüdâ-i Yeniçeriyân-ı Dergâh-ı âlî.