Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 269 Hüküm no: 414 Orijinal metin no: [79b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Orhan Gazi Vakfı'na ait Kartal'daki mukataanın Mehmed Ağa'ya iltizama verildiği Bâ‘is-i tahrîr-i hurûf oldur ki, Gekbüze’de vâki‘ merhûm ve mağfûrün-leh Sultan Orhan Gāzî’nin -tâbe serâhu- câmi‘-i şerîfi evkāfından olup vilâyet-i Anadolu’da Adalar nâhiyesinde Kartal ve tevâbi‘uhâ mukāta‘ası mâlı cizyesinden mâ‘adâ sene-i sâbıkı üzere bin iki yüz elli guruşa işbu bin yüz yirmi dokuz senesi Martı ibtidâsından bir senenin zabtı işbu sâhibü’t-temessük Mehmed Ağa’ya bundan evvel deruhde ve iltizâm olunmuşken bi-emrillâhi te‘âlâ sene-i mezbûrede mahsûl-i vakf kıllet üzere olup bedel-i iltizâm vefâ etmeyip zarârı olduğunu vilâyet kādısı efendi hazretleri yedinden mümzâ defter ve hüccet-i şer‘iye birle i‘lâm edip ve i‘lâm mûcebince nâzır-ı vakf-ı devletlü Dârüssa‘âde ağası hazretlerine istircâ-yı merhamet ricâsıyla arzuhâl ve Harameyn-i şerifeyn müfettişi fazîletlü Esad Mehmed Efendi dahi zarâr müte‘ayyen olduğunu i‘lâm ve i‘lâm mûcebince devletlü Dârüssa‘âde ağası hazretleri dahi sene-i sâbıkāsından yüz elli guruş noksânıyla üç sene bir tahvîl ile mültezim-i evvel mezbûr Mehmed Ağa’ya deruhde edesin deyü bu kullarına hitâben mektûb-ı âlîleri sâdır olmağla zarârını vakf-ı şerîfe teberru‘ ve bu senelerin hulûlünden sonra dahi min-ba‘d zarâr iddi‘âsı olmamak şartıyla sene-i sâbıkāsından beher senesi yüz ellişer guruş zarârına mahsûb olmak üzere işbu dârende-i hurûf kıdvetü’l-emâsil ve’l-akrân yine mültezim-i evvel olan Mehmed Ağa -zîde kadruhû- taleb ve beher sene bin yüzer guruşa râgıb olup işbu bin yüz otuz senesi Martı ibtidâsından bin yüz otuz iki senesi Şubatı âhirine değin üç sene bir tahvîl ile beher senesi bin yüz guruşa kabûl ve bâlâda mastûr olan şürût ve kuyûd üzere ve beher senenin mâlını senesi içinde tamâmen vakf-ı şerîfe edâ ve teslîm ve beher sene tecdîd-i temessük eylemek üzere deruhde ve iltizâm ve ol dahi bu siyâkda iltizâmı kabûl eylemekle tevliyetim hasebiyle işbu hurûf li-ecli’t-temessük tahrîr olunup zabt ve tasdîki içün kendüye verildi, gerekdir ki mûmâ-ileyh Mehmed Ağa mukāta‘a-i mezbûru fî-külli’l-vücûh mefrûzü’l-kalem ve maktû‘ü’l-kadem serbest olmak üzere zabt edip vâki‘ olan a‘şâr-ı şer‘iye ve rüsûm-ı örfiye ve cürm-i cinâyet ve yave ve kaçık ve kul ve câriye müjdegānesi ve tapu-yı zemîn ve resm-i bâgāt ve arûsâne ve hadravât ve bennâk ve ispençe ve beytülmâl-i hâssa ve âmme ve sâir hukūk ve rüsûmîn cüz'î ve küllî her ne olursa bi’l-cümle taraf-ı vakf-ı şerîf için ahz u kabz eyleye ve sene-i sâbıkālarda voyvoda olanlar ne minvâl üzere zabt edegelmişler ise ol minvâl üzere zabt ve ahzeyleye ve el-iyâzen billâhi te‘âlâ sene-i mezkûrelerde zarâr dahi olursa lede’l-hükkâm mesmû‘a olmayıp bu minvâl üzere kabûl ve on iki bin akçeden ziyâde mahlûlât vâki‘ olursa taraf-ı vakıfdan zabt oluna ve sizler ki re‘âyâ-yı vakıfsınız, mûmâ-ileyhi üzerinize zâbit bilip şer‘-i şerîfden ve kānûn-ı münîfden muvâfık ve mutâbık sözünden hâric vaz‘ u hareket etmeyesiz, bu minvâl üzere zabt u rabt edip âhardan kimesneye müdâhale eylemeye. Hurrire fi’t-târîhi’l-mezbûr li-seneti’l-mezkûre. El-fakīr Abdünnebi mütevellî-i vakf hâlâ. Sahîh