Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 283 Hüküm no: 435 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eşkıyalık eden yeniçerilerin yakalanıp cezalandırılması Bostancıbaşı ağanın mektûbudur Şerâyi‘-şi‘âr ve fezâil-disâr ve (°) ve (°) ve (°) kādıları efendileri hazretleri ve mefâhirü’l-emâsil ve’l-akrân yeniçeri serdârları ve a‘yân-ı vilâyet [ve] iş erleri -zîde kadruhum- inhâ ve ifhâm olunur ki, eşkıyâ gürûhu hadden bîrûn olup ba‘zı harâmîzâdeler yeniçerilik iddi‘âsıyla başlarına kalpak giyip ve kimi dravacılık? nâmıyla piştov ta‘bîr olunur salındırma tüfenkler ile etrâf-ı eknâfdan geşt ü güzâr ve gözlerine kesdirdikleri ibâdullâhın önüne inip katl-i nüfûs ve gāret-i emvâli pîşe edinip îsâl-i hasâret ve idlâlden hâlî olmamaları ile teftîş ve tefahhus için tarafımıza hitâben fermân-ı âlîşân sâdır olmağın ber-mûceb-i emr-i âlî mektûb tahrîr ve hâssa hasekilerinden kıdvetü’l-emâsil ve’l-akrân Ali Haseki -zîde kadruhû- tarafımızdan ta‘yîn ve irsâl olunmuşdur. Vusûlünde gerekdir ki, taht-ı hükûmetlerinizde zikr olunan kabâhat ile mahâll-i töhmetde bulunan ol makūle eşkıyâyı bi-eyyi hâl ahz ve cezâsı tertîbi için mûmâ-ileyh ma‘rifetiyle Âsitâne-i sa‘âdete ihzâr olunmak bâbında her biriniz dikkat ve ihtimâm eyleyip sâdır olan emr-i âlîşânım mazmûn-ı münîfi ile âmil olup hilâfı hareket eylememeniz me'mûldür. Mehmed, Ağa-yı Ser-bostancı.