Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 289 Hüküm no: 447 Orijinal metin no: [88a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İran'a gidip gelecek olan elçi Dürri Ahmed Efendi'nin ağırlıklarını taşıyan hayvanların yemlerinin temin edilmesi Akzâ kuzâti’l-müslimîn evlâ vülâti’l-muvahhidîn ma‘denü’l-fezâil ve’l-yakīn râfi‘u a‘lâmi’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtassu bi-mezîdi inâyeti’l-meliki’l-mu‘în mevlânâ (°) kādısı -zîdet fezâiluhû- ve mefâhirü’l-kuzât ve’l-hükkâm ma‘âdinü’l-fezâil ve’l-kelâm Üsküdar’dan Acem hudûduna varınca yol üzerinde vâki‘ kādılıkların kādıları -zîdet fazluhum- ve mefâhirü’l-emâsil ve’l-akrân kethüdâ yerleri ve yeniçeri serdârları ve subaşıları ve a‘yân-ı vilâyetin iş erleri -zîdet kadruhum- tevkī‘-i refî‘-i hümâyûn vâsıl olucak ma‘lûm ola ki bu def‘a Devlet-i aliyyemden Acem şâhı tarafına elçilik ile memûr ve irsâl olunan iftihârü’l-emâcid ve’l-ekârim Dürri Ahmed’in -dâme mecdühû- ağırlığı tahmîli için Istabl-ı âmirem tarafından verilen üç katar katır ve üç katar devenin ber-vech-i mu‘tâd ta‘yînâtları içün devenin beher katarına birer keyl şa‘îrden üç keyl şa‘îr ve yarımşar kantar samandan bir buçuk kantar saman ki cem‘an altı keyl şa‘îr ve dört buçuk kantar samanın lâzım gelen bahâsı tekâlîflerinden takās olmak üzere Üsküdar’dan [Acem] hudûduna varıp gelince nüzûl eylediği menâzilde ahâlî-i kazâ tarafından verilmek fermânım olmağın inşâallâhu te‘âlâ her kangınızın taht-ı kazâsına vâsıl olursa ol mikdâr şa‘îr ve samanı ahâlî-i kazâ tarafından verdirip ve bahâsı tekâlîflerinden takās olmak üzere elçi-yi mûmâ-ileyhden memhûr temessük aldırıp hıfz etdirmeniz bâbında fermân-ı âlîşânım sâdır olmuşdur. Buyurdum ki hükm-i şerîfimle vardıkda bu bâbda vech-i meşrûh üzere şeref-yâfta-i sudûr olan işbu emr-i celîlü’ş-şân-ı vâcibü’l-imtisâl ve lâzımü’l-ittibâ‘ımın mazmûn-ı itâ‘at-makrûnuyla âmil olup hilâfıyla vaz‘-ı hareketden be-gāyet ihtirâz eyleyesiz, şöyle bilesiz, alâmet-i şerîfe i‘timâd kılasız. Tahrîren fi’l-yevmi’t-tâsi‘ ışrîn min-Şa‘bâni’l-mu‘azzam li-sene isnâ ve selâsîn ve mi'e ve elf. Kad vasale ileynâ fî-gurreti Ramazan. Be-makām-ı Kostantıniyye el-mahrûse.