Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 296 Hüküm no: 460 Orijinal metin no: [90b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali'nin, kendisine odun vurarak yaralayan Hasan'dan şikâyetçi olduğu Fi’l-asl Erzurum vilâyetinden olup ırgad tâifesinden işbu bâ‘isü’l-kitâb Ali b. Hüseyin Mahrûse-i Üsküdar’a muzâfe Adalar nâhiyesine tâbi‘ Kartal nâm kasabada meclis-i şer‘-i şerîf-i enverde ve mahfil-i dîn-i münîf-i ezherde Hasan ve İsmail nâmân kimesneler mahzarlarında üzerlerine da‘vâ ve takrîr-i kelâm edip târîh-i kitâb gecesi kasaba-i mezbûrede leb-i deryâda kendü hâlimde iken mezbûrân Hasan ve İsmail nâmân kimesne ikisi ma‘an darb kasdı ile üzerime hücûm ve mezbûr Hasan odun yarması ile başımın sağ tarafından perçem kurbünden bi-gayri hakkın beni urup mecrûh eyledi, el-ân suâl olunup icrâ-yı hak olunmak matlûbumdur dedikde gıbbe’s-suâl akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup yine tâife-i mezbûrûndan Ahmed b. Hasan ve es-Seyyid Hasan b. İbrahim nâmân kimesneler mahfil-i kazâya hâzırân olup istişhâd olunduklarında fi’l-hakīka târîh-i kitâb gecesi leb-i deryâda kendü hâlinde iken mezbûrân Hasan ve İsmail nâmân kimesneler ikisi ma‘an darb kasdı ile üzerine hücûm edip ve mezbûr Hasan odun yarması ile bi-gayri hakkın başının sağ tarafından perçem kurbünden bizim huzûrumuzda urup mecrûh eyledi, biz bu husûsa bu vech üzere şâhidleriz ve şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb ve tahrîr ü terkīm olundu. Tahrîren fi’l-yevmi’s-sâdis min-şehri Recebi’l-mürecceb sene selâse ve selâsîn ve mi'e ve elf. Şuhûdü’l-hâl: Mehmed sâkin-i Amasya, Hüseyin Beşe b. Ömer, Mustafa yasakçı ve gayruhum.