Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 188 Hüküm no: 102 Orijinal metin no: [30b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ahmed Usta’nın Aşağı Odalar Ortasının Para Vakfı’na olan borcunun terekesinden tahsil edildiği Husûs-ı âti’l-beyânın mahallinde istimâ‘ ve tahrîri içün bi’l-iltimâs savb-ı şer‘den me’zûnen bâ-fermân-ı âlî Mevlânâ el-Hâc Abdurrahman Efendi b. Mustafa Yoros kazâsı muzâfâtından Göksu’da Sinan Efendi mahallesinde sâkin iken bundan akdem vefât eden Ahmed Usta b. Abdullah’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde Hadîka-i hâssa-i şehriyârîde vâki‘ Aşağı Odalar’ın ortaları mühimmâtına mevkūfe nukūdun bi’l-fi‘il mütevellîsi olup hadîka-i mezbûrede sâkin işbu hâfızü’l-kitâb Hasan Bey b. İsmail meclis-i ma‘kūd-ı mezkûrda müteveffâ-yı mezbûrun sagīre kızı Emine ve sagīr oğlu Mustafa’nın vâlideleri ve tesviye-i emrlerine kıbel-i şer‘-i enverden mansûbe vasiyesi olmağla terekesine vaz‘-ı yed eden Saliha Hatun bt. Hüseyin mahzarında bi’t-tevliye üzerlerine da‘vâ ve takrîr-i kelâm edip müteveffâ-yı mezbûr Ahmed Usta b. Abdullah b. Abdullah [31a] zimmetinde mütevellîsi olduğum asıl mal-ı vakfdan mukaddemâ yedinden istidâne ve kabz ve kendi mesârifine sarfla istihlâk etmekle ba‘de külli’l-hesâb cânib-i vakf-ı mezkûra vâcibü’l-edâ kırk beş guruş deyni olup hattâ fevtinden otuz gün mukaddem huzûr-ı Müslimînde ikrâr ve işhâd edip kable’l-edâ fevt olmağla yed-i vasîde olan terekesinden taleb ederim suâl olunsun dedikde gıbbe’s-suâl vasiye-i mezbûre cevâbında tereke-i müteveffâ-yı mezbûra vech-i muharrer üzere vaz‘-ı yedini ikrâr ve müdde‘î-i mezbûrun vech-i meşrûh üzere müdde‘âsını inkâr edicek müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden mahmiye-i İstanbul’da Dâye Hatun mahallesinde sâkin Derzi Mustafa b. Abdullah ve Göksu’da sâkin Kandil bahçesi ustası el-Hâc Mustafa Usta b. Ahmed li-ecli’ş-şehâde meclis-i ma‘kūd-ı mezkûra hâzırân olup istişhâd olunduklarında fi’l-hakīka müteveffâ-yı mezbûr Ahmed Usta fevtinden otuz gün mukaddem işbu müdde‘î-i mezbûr yedinden asıl mal-ı vakf-ı mezbûrdan ba‘de külli’l-hesâb istidâne ve kabz ve mesârifime sarfla istihlâk eylediğim kırk beş [guruş] vâcibü’l-edâ ve zimmetimde vakf-ı mezbûra deynim vardır deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm müdde‘î-i mezbûr Hasan Bey meclis-i ma‘kūd-ı mezkûrda zâtı ta‘rîf-i şer‘î ile mu‘arrefe mezbûre Saliha mahzarında bi’t-tevliye ikrâr ve takrîr-i kelâm edip ânifen edâsına hükm-i şer‘î lâhık olan kırk beş guruşu vakf-ı mezkûr içün mezbûre Saliha yedinden tamâmen ahz u kabz eyledim meblağ-ı mezbûrdan yedinde bir şey kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû [ma‘an] mürsel Hasan Çelebi b. Abdullah ve Mehmed b. Ahmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 22 Zilhicce sene 1109 Şuhûdü’l-hâl: Büyük Yazıcı İbrahim Efendi b. Hüseyin, Bayram Bey b. Mahmud, Musa Haseki b. Ahmed, Ali Haseki b. Ömer, İsmail Bey b. Abdullah, Kara Mehmed b. Hüseyin.