Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 235 Hüküm no: 139 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin vefat eden Rahime Hatun’un varisi olduğunu ispat ettiği Mahmiye-i İstanbul’da Koruk Mahmud mahallesinde bundan akdem vefât eden Rahime Hatun bt. el-Hâc Ali b. Hızır’ın li-ebeveyn er karındaşı oğlu ve vech-i âtî üzere usûbet-i nesebiye cihetinden vârisi olduğunu iddi‘â eden hâfızü’l-kitâb Mehmed Çelebi b. Mustafa mahfil-i kazâda müteveffât-ı mezbûrenin kebîre kızı olmağla terekesine vaz‘-ı yed eden Âişe bt. Hızır tarafından husûs-ı âti’l-beyânda husûmet ve redd-i cevâba müseccel vekîli zevci Hasan Çelebi b. Abdullah mahzarında üzerine da‘vâ ve takrîr-i kelâm edip müteveffât-ı mezbûre Rahime Hatun’un li-ebeveyn er karındaşı olup Mısr-ı Kāhire’de Dergâh-ı âlî yeniçerilerinin Onsekizinci Ağa Bölüğü odasında odabaşı ve mahalle-i mezbûre ahâlîsinden olan İbrahim Beşe b. el-mezbûr el-Hâc Ali bin yüz yedi senesi Ramazan-ı şerîfi’nin birinci günü fevt oldukda benim babam merkūm Mustafa müteveffât-ı mezbûre Rahime ile li-ebeveyn karındaşlar olup anaları ismi Âişe ve babaları ismi mezbûr el-Hâc Ali ve dedeleri ismi merkūm Hızır ve maskat-ı re’sleri mahalle-i mezbûre olmağla zâhirde müteveffât-ı mezbûrenin terekesinin sülüsânı kızları müvekkile-i merkūme Âişe ile âhar kızı Emine’ye ve bâkīsine usûbet-i nesebiye cihetinden benden gayrı vâris ve âhar müstahık yoğiken müvekkile-i mezbûre cümle terekeye bi-gayr-ı hakkın vaz‘-ı yed edip hisse-i irsiyemi bana teslîmden imtinâ‘ eder suâl olunsun dedikde gıbbe’s-suâl vekîl-i mezbûr cevâbında müvekkilesi mezbûre Âişe’nin vech-i muharrer üzere terekesine vaz‘-ı yedini ikrâr ve müdde‘î-i mezbûr vech-i mütebeyyin üzere müdde‘âsını inkâr edicek müdde‘î-i mezbûrdan evvelâ merkūm İbrahim Beşe’nin târîh-i merkūmda fevtine ve sâniyen usûbet-i nesebiye cihetinden verâsetine beyyine taleb olundukda udûl-ı Müslimînden zikr olunan oda yoldaşlarından olup hâlâ mahalle-i mezbûre ahâlîsinden Kal‘alı Şa‘bân Beşe b. Mustafa ve İbrahim Beşe b. Mustafa li-ecli’ş-şehâde meclis-i şer‘a hâzırân olup istişhâd olundukda fi’l-hakīka müteveffât-ı mezbûre Rahime Hatun bt. el-Hâc Ali b. Hızır’ın li-ebeveyn er karındaşı olup medîne-i mezbûrede oda-i mezkûrede odabaşımız olan merkūm İbrahim Beşe bin yüz yedi Ramazan-ı şerîfi’nin birinci günü fevt oldukda biz cenâzesine hâzır olup mekābir-i Müslimîne defn ve müdde‘î-i mezbûr Mehmed Çelebi’nin babası merkūm Mustafa müteveffât-ı mezbûre Rahime Hatun ile li-ebeveyn karındaşlardır anaları ismi Âişe ve babaları ismi mezbûr el-Hâc Ali ve dedeleri ismi merkūm Hızır ve maskat-ı re’sleri mahalle-i mezbûredir zâhirde müteveffât-ı mezbûrenin terekesinin sülüsüne usûbet-i nesebiye cihetinden işbu müdde‘î-i mezbûr Mehmed Çelebi’den gayrı vâris ve âhar müstahık olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm kayd-şüd. Fî 8 Safer sene 1110 Şuhûdü’l-hâl: Uşşâkī Mehmed Efendi b. Mehmed, Abdurrahim Efendi b. Mehmed, es-Seyyid Abdullah Efendi b. İbrahim, Mehmed Efendi b. Pîrî, Kara Mehmed Muhzır.