Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 270 Hüküm no: 167 Orijinal metin no: [48a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muslu Beşe’nin varislerinden Fatıma ile Ayşe’nin mirasa ait eşya davaları Mahmiye-i İstanbul’da Şeyh Vefâ mahallesinde sâkin bundan akdem vefât eden Muslu Beşe b. Receb b. Muslu nâm mukayyidin(?) verâseti zevce-i menkûha-i metrûke[si] Âişe bt. Hüseyin ile li-ebeveyn kız karındaşı Fâtıma nâm hatuna münhasıra oldukdan sonra zâtı ta‘rîf-i şer‘î ile mu‘arrefe olan mezbûre Fâtıma Hatun mahfil-i kazâda tereke-i müteveffâ-yı mezbûra bi’l-verâse vâzı‘atü’l-yed olan işbu hâfızatü’l-kitâb merkūme Âişe Hatun muvâcehesinde üzerine da‘vâ ve takrîr-i kelâm edip mezbûre Âişe Hatun karındaşım müteveffâ-yı mezbûrun terekesinden mecmû‘u altmış guruş kıymetli altı tencere ve bir orta keçesi ve iki güğüm ve iki kapaklı bakraç ve iki kahve ibriği ve on aded fağfûrî fincan ve bir tuç havan ve beş yorgan ve bir velense ve bir Yanbolu kebesi ve bir minder ve bir döşek ve dört aded beledî yastık ma‘a gılâf ve bir hamam seccâdesi ve bir yan keçesi ve üç kavuk ve iki sarık ve biri yeşil ve biri mâî iki çuka ferâce ve bir zenne ferâcesi ve altı sahan ve bir tuman çakşırı ve bir penbeli bez çakşır ve bir kapama ve bir zıbın ve iki don, iki gömlek ve iki sepet sandığına bi-gayr-ı hakkın vaz‘-ı yed edip bana isâbet eden selâseten erbâ‘ hissemi teslîmden imtinâ‘ eder suâl olunsun dedikde gıbbe’s-suâl mezbûre Âişe Hatun cevâbında eşyâ-i muharrere-i merkūmeyi zevcim müteveffâ-yı mezbûr Muslu Beşe hâl-i kemâl-i sıhhatinde fevtinden kırk beş gün mukaddem safka-i vâhide ile altmış guruşa bana huzûr-ı Müslimînde bey‘ ve teslîm ben dahi vech-i muharrer üzere iştirâ ve tesellüm ettiğimden sonra semeni olan meblağ-ı merkūm altmış guruşun kırk beş guruşundan zimmetimi ibrâ ve bâkī on beş guruşunu benden ahz u kabz etmekle eşyâ-i mezbûre mülk-i müşterâm olmuşdur deyü def‘le mukābele ve istintâk olunsun dedikde gıbbe’l-istintâk ve’l-inkâr müdde‘iye-i mezbûre Âişe’den def‘-i meşrûhuna beyyine taleb olundukda udûl-ı ahrâr-ı ricâl-i Müslimînden olup mahalle-i merkūme sâkinlerinden İmâm Abdullah Efendi b. Ahmed Efendi ve Ahmed Efendi b. Bayram nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Muslu Beşe b. Receb b. Muslu hâl-i kemâl-i sıhhatinde fevtinden kırk beş gün mukaddem eşyâ-i muharrere-i mezkûresini zevcesi mezbûre Âişe Hatun’a safka-i vâhide ile altmış guruşa bey‘ ve teslîm ol dahi ber-vech-i muharrer iştirâ ve tesellüm ettiğinden sonra semeni olan meblağ-ı mezbûr altmış guruşun kırk beş guruşundan mezbûre Âişe Hatun’un zimmetini ibrâ ve bâkī on beş guruşunu ahz u kabz etmekle eşyâ-i mezbûre merkūme Âişe Hatun’un mülk-i müşterâsı olmuşdur biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle mezbûre Fâtıma Hatun husûs-ı mezkûra müte‘allık merkūme Âişe Hatun’a bî-vech mu‘ârazadan men‘ olundukdan sonra meblağ-ı bâkī-i mezbûr on beş guruşun yedi guruşu müteveffâ-yı mezbûrun techîz ve tekfînine sarf olunup ve altı guruş bir rub‘u mezbûre Âişe Hatun’un mehr-i müeccel-i müsbeti içün verilip bâkī kalan bir guruş ve üç rub‘dan mezbûre Fâtıma’nın hissesine isâbet eden yüz elli yedi sağ akçeyi mezbûre Âişe Hatun’un yedinden ahz u kabz etmeğin mâ-vaka‘a kayd-şüd. Fî 21 Safer sene 1110 Şuhûdü’l-hâl: Mustafa Bey b. Abdullah, Nasuh Çelebi b. Yusuf, İbrahim Çelebi b. Mehmed, Mehmed Çelebi b. Hüseyin, Hüseyin Çelebi b. Mehmed ve gayruhum.