Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 276 Hüküm no: 173 Orijinal metin no: [49a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Mehmed Efendi’nin küçük oğlu Abdullah’a nafaka takdir edildiği Mahmiye-i İstanbul’da Topkapısı kurbünde Cevvîzâde mahallesinde sâkin iken bundan akdem vefât eden Mehmed Efendi b. Abdurrahman’ın sagīr oğlu Abdullah’ın tesviye-i umûruna kıbel-i şer‘-i enverden mansûb vasîsi hâfızü’l-kitâb es-Seyyid Ömer Çelebi b. Abdurrahman mahfil-i kazâda bi’l-vesâye ikrâr ve takrîr-i kelâm edip vasîsi olduğum sagīr-i mezbûrun nafaka ve kisveye ihtiyâcı olmağla mal-ı müntakilinden kadr-ı ma‘rûf nafaka ve kisve-bahâ kıbel-i şer‘den farz ve takdîr olunmak matlûbumdur dedikde vasiyy-i mezbûr[un] kelimât-ı meşrûhası vâkı‘a mutâbıka idiği lede’ş-şer‘ zâhir ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri sagīr-i mezbûrun nafaka ve kisvesi’çün mal-ı müntakilinden târîh-i kitâbdan beher yevm on ikişer sağ akçe farz ve takdîr buyurup meblağ-ı mefrûz-ı merkūm on iki akçeyi levâzım-ı sagīr-i mezbûra harc ü sarfa ve vakt-i hâcetde istidâneye ve lede’z-zafer malına rücû‘a vasiyy-i mezbûra izin vermeğin mâ-vaka‘a kayd-şüd. Fî 20 Safer sene 1110 Şuhûdü’l-hâl: Abdurrahman Efendi b. Ahmed Efendi, Nasuh Beşe b. Yusuf, Mehmed Beşe b. Hüseyin, Hüseyin Çelebi b. Mehmed, Hasan Çelebi b. Abdullah, İbrahim Çelebi b. Mehmed.