Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 278 Hüküm no: 175 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Mustafa’nın varislerinin miras hisseleri hakkında zimmetlerini ibra ettikleri Dârü’l-hilâfeti’l-aliyye Kostantıniyyetü’l-mahmiye mahallâtından Fethiye kurbünde Kâtib Muslihiddin mahallesi ahâlîsinden olup bundan esbak fevt olan Bostânî Mustafa b. Şa‘bân’ın verâseti zevce-i metrûkesi Emetullah Hatun bt. Mehmed ile li-ebeveyn karındaşları oğulları Hüseyin ve Mehmed b. Şa‘bân’a ve Ali b. Receb’e ve Himmet b. Ramazan’a münhasıra ve tashîh meselesi on altı sehmden olup sihâm-ı mezbûreden dört sehmi mezbûreye ve bâkī on üçer sehmi mezbûrlardan her birine isâbet eylediği şer‘an mütehakkık oldukdan sonra mezbûr Hüseyin asâleten ve merkūmûn Mehmed ve Ali ve Himmet taraflarından husûs-ı âti’l-beyânda ahz ve ibrâya bâ-hüccet-i şer‘iyye vekîlleri Mehmed Efendi b. Mahmud vekâleten meclis-i şer‘-i hatîr-ı lâzımü’t-tevkīrde zâtı ta‘rîf-i şer‘î ile mu‘arrefe olan râfi‘atü’l-kitâb merkūmûn [merkūme] Emetullah Hatun muvâcehesinde her biri ikrâr-ı tâm ve takrîr-i kelâm edip mûrisimiz müteveffâ-yı mezbûrun cemî‘ akār ve menkūl ve esâs-ı beyt menkūlesinden tashîh-i mezbûr üzere on iki sehm-i şâyi‘imiz mukābelesinde bize isâbet eden sekiz guruşu müteveffâ-yı mezbûrun terekesine vaz‘-ı yed eden mezbûre Emetullah’dan ahz u kabz edip kalîl ü kesîr ve celîl ü hakīr müteveffâ-yı mezbûrun mecmû‘-ı terekesinden hissemize isâbet eden mîrâs da‘vâsından ve târîh-i nemîkaya gelince beynimizde cârî ahz ü i‘tâ ve mu‘âmelât-ı şettâya müte‘allıka âmme-i de‘âvîden mezbûre Emetullah’ın ve kefîli işbu hâzır bi’l-meclis Osman Beşe b. Ali’nin zimmetlerini ibrâ-i âmm-ı katı‘u’l-hısâmla ibrâ ve iskāt eyledik dediklerinde gıbbe’t-tasdîkı’l-vicâhi’l-mu‘teber mâ-vaka‘a kayd-şüd. Fî 15 min-Safer sene 1110 Şuhûdü’l-hâl: Mukayyid Mustafa Efendi b. Mehmed, Ağraz Muhyî Efendi b. ( ), Yahya Efendi b. Mustafa, Ahmed Efendi b. İsmail, İbrahim b. Musa, Receb b. Mustafa, Mustafa b. İbrahim, Çavuş Mehmed, Ahmed b. Süleyman, Kara Mehmed b. Hüseyin, el-Hâc Süleyman ve gayruhum.