Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 357 Hüküm no: 240 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail’in vefat eden Mehmed Efendi’de alacağı olduğunu ispat ettiği Mahmiye-i İstanbul’da Cevvîzâde mahallesi sâkinlerinden olup tarîk-i hacc-ı şerîfde bundan akdem vefât eden Mehmed Efendi b. Mustafa b. Abdullah’ın verâseti zevce-i menkûha-i metrûkesi Şerife Âişe bt. es-Seyyid Ömer nâm hatun ile sulbî sagīr oğlu Abdullah’a münhasıra olduğu şer‘an sâbit ve mütehakkık oldukdan sonra yine mahmiye-i mezbûrede Süleymaniye mahallesinde sâkin işbu râfi‘ü’l-kitâb el-Hâc İsmail b. Mehmed meclis-i şer‘-i şerîfde sagīr-i mezbûrun kıbel-i şer‘den mansûb vasîsi olan es-Seyyid Ömer Çelebi b. es-Seyyid Abdurrahman mahzarında üzerine da‘vâ ve takrîr-i kelâm edip müteveffâ-yı mezbûr zimmetinde cihet-i karz-ı şer‘îden seksen dört guruş hakkım olup hattâ hâl-i hayâtında fevtinden dört ay mukaddem meblağ-ı mezbûr cihet-i merkūmeden bana deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı Müslimînden olup Üsküdar’da Kılcılar Hanı’nda sâkin Osman Bey b. Ali ve mahmiye-i mezbûrede Kocamustafapaşa mahallesinde sâkin Abdullah Bey b. Ahmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Mehmed Efendi b. Mustafa b. Abdullah hâl-i hayâtında <> fevtinden dört ay mukaddem meblağ-ı mezbûr seksen dört guruş cihet-i karzdan müdde‘î-i mezbûra deyni olduğunu bizim huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle oldukdan sonra müdde-i mezbûr el-Hâc İsmail müteveffâ-yı mezbûrdan müdde‘âsı olan meblağ-ı mezbûr seksen dört guruşu müteveffâ-yı mezbûr Mehmed Efendi b. Mustafa b. Abdullah’dan hayâtında ahz u kabz edip veyâ turuk-ı şer‘iyyeden bir tarîk ile ibrâ-i zimmet etmediğine yemîn teklîf olundukda ol dahi ber-vefki’l-mesûl yemîn billâhi’l-aliyyi’l-a‘lâ etmeğin mûcebince ba‘de’l-hükm mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-şehri Rebî‘i’l-evvel li-seneti aşer ve mi’ete ve elf. Şuhûdü’l-hâl: Ahmed Çelebi b. Pîrî, Şeyhzâde Süleyman b. Mehmed Efendi, Şeyhzâde Mehmed Efendi, Ahmed Efendi b. Mehmed Efendi, Ömer Efendi ve gayruhum.