Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 366 Hüküm no: 251 Orijinal metin no: [67a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed’in vefat eden Abdullah Ağa’da alacağı olduğunu ispat ettiği Husûs-ı âti’z-zikrin mahallinde istimâ‘ ve tahrîri içün bi’l-iltimâs cânib-i şer‘-i enverden me’zûnen ba‘s olunan Mevlânâ Mehmed Efendi b. Mahmud mahmiye-i İstanbul’da el-Hâc Evliyâ mahallesinde Saraylı Hadîce Hatun bt. Abdullah b. Abdullah’ın sâkine olduğu menziline varıp zeyl-i vesîkada isimleri mastûr Müslimîn huzûrlarında akd-i meclis-i şer‘-i âlî ettikde mahrûse-i Galata’ya tâbi‘ kasaba-i Kasımpaşa’da Sinanpaşa mahallesinde sâkin hâfızü’l-kitâb Yüncü el-Hâc Mehmed b. Ahmed meclis-i ma‘kūd-ı mezkûrda mezbûre Saraylı Hadîce Hatun’un zevci ve devletlü sa‘âdetlü Beyhan Sultan -dâmet iffetühâ ve istakarret azametühâ- hazretlerinin kethüdâları iken bundan akdem vefât eden Abdurrahman Ağa b. Şa‘bân b. Abdullah’ın evlâd-ı sıgārı Mehmed ve Âişe ve Fâtıma’nın tesviye-i emrlerine kıbel-i şer‘den mansûb vasîleri olmağla terekesine vaz‘-ı yed eden Ali Efendi b. Ahmed ile zevce-i metrûkesi mezbûre Saraylı Hadîce Hatun tarafından husûs-ı âti’l-beyânda husûmet ve redd-i cevâba müseccel vekîli el-Hâc Hüseyin b. Ebubekir mahzarlarında üzerlerine da‘vâ ve takrîr-i kelâm edip müteveffâ-yı mezbûr Abdurrahman Ağa b. Şa‘bân b. Abdullah zimmetinde mikdârı beynimizde [67b] ilm-i şer‘î ile ma‘lûm dokuz seneden beri yedinden müşterâ ve makbûz pirinç bahâsından üç yüz guruş hakkım olup hattâ müteveffâ-yı mezbûr hâl-i kemâl-i sıhhatinde fevtinden bir sene mukaddem meblağ-ı mezbûrun elli guruşunu bana def‘ u teslîm ben dahi yedinden ahz u kabz edip meblağ-ı bâkī iki yüz elli guruş zimmetinde bana edâsı lâzım deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl vasiyy-i mezbûr ile vekîl-i mezbûr el-Hâc Hüseyin cevâblarında tereke-i müteveffâ-yı mezbûra ber-vech-i muharrer vaz‘-ı yedlerini ikrâr ve müdde‘î-i mezbûr ber-vech-i mübeyyin müdde‘âsını inkâr edicek müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden ve mârrü’z-zikr Sinanpaşa mahallesi sâkinlerinden el-Hâc Salih b. Ahmed ve Mehmed Çelebi b. el-Hâc Rıdvan nâm kimesneler li-ecli’ş-şehâde meclis-i ma‘kūd-ı mezkûrda hâzırân olup istişhâd olunduklarında fi’l-vâki‘ müteveffâ-yı mezbûr Abdurrahman Ağa b. Şa‘bân b. Abdullah hâl-i kemâl-i sıhhatinde fevtinden bir sene mukaddem müdde‘î-i mezbûr el-Hâc Mehmed’e cihet-i merkūmeden zimmetinde edâsı lâzım iki yüz elli guruş deynim vardır deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de ri‘âyeti şerâiti’l-kabûl şehâdetleri makbûle olmağın gıbbe’t-tahlîfi’ş-şer‘î mûcebiyle meblağ-ı bâkī-i mezbûr iki yüz elli guruşu tereke-i müteveffâ-yı mezbûrdan müdde‘î-i merkūma teslîme mezbûrân Ali Efendi ve el-Hâc Hüseyin’e tenbîh eylediğini mevlânâ-yı mezbûr mahallinde tahrîr ve ma‘an ba‘s olunan Çukadâr el-Hâc Süleyman ve Muhzır Hasan Çelebi b. Abdullah ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fî gurre-i şehri Rebî‘ülevvel sene 1110 Şuhûdü’l-hâl: Salih Efendi b. Ahmed, Abdurrahman Efendi b. Mahmud, İbrahim Halîfe b. Edhem, İbrahim Çelebi b. Abdi, Ahmed Bey b. Mustafa, el-Hâc Ahmed b. Mustafa, Süleyman b. Abdullah, Salih Efendi b. İbrahim, Ali Çelebi b. Mehmed, Salih Çelebi b. Ebubekir ve gayruhum.