Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 393 Hüküm no: 275 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Süleyman Beşe’nin küçük çocuklarına Mustafa Beşe’nin vasi tayin edilip çocuklara nafaka takdir edildiği Mahmiye-i İstanbul’da Molla Hüsrev mahallesinde sâkin iken bundan akdem vefât eden Süleyman Beşe b. Abdullah’ın sagīr oğlu Ahmed ve sagīre kızı Emine’nin tesviye-i emrlerine bir vasî nasbı lâzım ve mühim olmağın emânet ve diyânet ile ma‘rûf ve vesâyet uhdesinden gelmeğe her vechile kādir idiği zeyl-i kitâbda muharrerü’ş-şâhidûn-ı muvahhidîn haberleri ile lede’ş-şer‘i’l-mübîn zâhir ve mütehakkık olan sagīrân-ı mezbûrânın enişteleri bâ‘isü’l-kitâb Mustafa Beşe b. Mustafa’yı hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri sagīrân-ı mezbûrânın vakt-i rüşd ü sedâdlarına gelince tesviye-i emrlerine vasî nasb ü ta‘yîn buyurmalarıyla ol dahi vesâyet-i merbûreyi ba‘de’l-kabûl vasiyy-i mezbûr talebiyle hâkim-i müşârün-ileyh hazretleri sagīrân-ı mezbûrânın mal-ı müntakillerinden nafaka ve kisve ve sâir levâzım-ı zarûriyeleri içün târîh-i rakīmden yevmî ikişer sağ akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sagīrân-ı mezbûrânın levâzım-ı zarûriyelerine harc ü sarfa vakt-i hâcetde istidâneye ve lede’z-zafer mallarına rücû‘a vasiyy-i mezbûra izin vermeğin mâ-vaka‘a bi’t-taleb kayd-şüd. Hurrire fî 15 min-şehri Rebî‘i’l-âhir li-seneti aşer ve mi’ete ve elf. Şuhûdü’l-hâl: Mustafa Odabaşı b. Osman, Ali Beşe b. Ahmed, Ahmed Çelebi b. Süleyman, eş-Şeyh Ahmed Efendi, es-Seyyid Mustafa Çelebi b. Şeyhü’l-mezbûr.