Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 629 Hüküm no: 782 Orijinal metin no: [141a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yeniçarşı ve Galata Attar esnafı dellâlı Yasef’e müdahale olunmaması konusunda ferman Düstûr-ı mükerrem müşîr-i müfahham, nizâmü’l-âlem, müdebbir-i umûri’l-cumhûr bi’l-fikri’s-sâkıb, mütemmim-i mehâmmi’l-enâmi bi’r-re’yi’s-sâib, mümehhid-i bünyâni’d-devleti ve’l-ikbâl, müşeyyid-i erkâni’s-saltanatı ve’l-iclâl, el-mahfûfu bi sunûfi avâtıfi’l-meliki’l-a‘lâ Âsitâne-i sa‘âdetimde sadâret-i uzmâ ve vekâlet-i kübrâ kāimmakāmı olan vezîrim Receb Paşa -edâmallâhu te‘âlâ iclâlehû- ve a‘lemü’l-ulemâ’i’l-mütebahhirîn, efdalü’l-fuzalâ’i’l-müteverri‘în, yenbû‘ü’l-fezâili ve’l-yakīn, keşşâfü’l-müşkilâti’d-dîniyye, hallâlü’l-mu‘dilâti’l-yakīniyye, miftâhu künûzi’l-hakāyık, misbâhu rumûzi’d-dekāyık, el-mahfûfu bi sunûfi avâtıfi’l-meliki’l-a‘lâ Anadolu kazaskerliği pâyesiyle bi’l-fi‘l İstanbul kadısı olan Mevlânâ İbrahim -edâmallâhu te‘âlâ fezâilühû- tevkī-i refî‘-i hümâyûn vâsıl olucak ma‘lûm ola ki Yasef nâm yahudi Ordu-yı hümâyûnuma arzuhâl sunup mahrûse-i İstanbul’da Yeniçarşı ve Galata’ya gelen attâr metâ‘ı dellâlı olmak istedikde tâife-i mezbûre kethüdâsı ve ba‘zıları hilâf-ı şer‘-i şerîf kimesneye vaz‘ ve te‘addîsi yok iken sana dellâllık ettirmeziz deyû te‘addî üzre oldukların bildirip men‘ ü def‘ olunmak bâbında hükm-i hümâyûnum [recâ] eylediği ecilden hilâf-ı şer‘-i şerîf rencîde ettirilmemek emrim olmuşdur buyurdum ki hükm-i hümâyûnumla vusûl buldukda bu bâbda sâdır olan emrim üzre husûs-ı mezbûra tamâm hak ve adl üzre mukayyed olup göresiz arz olunduğu üzre mezbûr Yasef yarar kefîli olup ve hilâf-ı şer‘-i şerîf kimesneye vaz‘ ve te‘addîsi olmaya min ba‘d şer‘-i şerîfe ve emr-i hümâyûnuma muhâlif tâife-i mezbûre kethüdâsına ve sâirlerine sana dellâllık ettirmeziz deyû rencîde ettirmeyip men‘ ü def‘ edip bu husûs için dahi şikâyet olunmalu eylemeyesiz şöyle bilesiz alâmet-i şerîfime i‘timâd kılasız. Fî evâili Cumâdelâhire li sene seb‘a ve tis‘în ve elf. Be yurd-ı sahrâ-yı Edirne.