Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 470 Hüküm no: 342 Orijinal metin no: [86a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa’nın vefat eden Saraç Solak Mehmed Çelebi’de alacağı olduğunu ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın cânib-i şer‘den me’zûnen irsâl olunan Mevlânâ es-Seyyid İsmail Efendi b. es-Seyyid Ahmed Efendi mahmiye-i İstanbul’da Kuyumcu Bahşayiş mahallesinde sâkin el-Hâc Mustafa b. el-Hâc Mehmed’in menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde işbu râfi‘ü’l-kitâb mezbûr el-Hâc Mustafa meclis-i ma‘kūd-ı mezbûrda mahalle-i mezbûre ahâlîsinden olup bundan akdem misâfiren mahrûse-i Edirne’de vefât eden Saraç Solak Mehmed Çelebi b. Receb b. Abdullah’ın vâlidesi ve terekesine bi’l-verâse vaz‘-ı yed edip zâtı mahalle-i mezbûrda sâkin Hoca İbrahim Efendi b. Mehmed Efendi ve mahmiye-i mezbûrede Veled-i Karabaş mahallesinde [sâkin] Abdi Çelebi b. Mehmed ta‘rîfleriyle mu‘arrefe olan Hadîce Hatun bt. Abdullah mahzarında üzerine da‘vâ ve takrîr-i kelâm edip işbu yedimde olan mümzâ ve mahtûm deyn temessükleri nâtık olduğu üzere müteveffâ-yı mezbûr Saraç Mehmed Çelebi b. Receb b. Abdullah zimmetinde cihet-i karzdan beş yüz yetmiş beş esedî guruş ve âhar temessükü mûcebince cihet-i karzdan yüz esedî guruş ki cem‘an altı yüz yetmiş beş esedî guruş hakkım olup meblağayn-ı mezbûreyni kendi mesârifine sarfla istihlâk edip kable’l-edâ fevt olmağla müteveffâ-yı mezbûrun terekesinden taleb ederim suâl olunsun dedikde gıbbe’s-suâl mezbûre Hadîce cevâbında terekesine vech-i muharrer üzere vaz‘-ı yedini ikrâr ve müdde‘î-i mezbûrun vech-i muharrer üzere müdde‘âsını inkâr edicek müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden zikr olunan Kuyumcu Bahşayiş mahallesinde sâkin mezbûr Hoca İbrahim Efendi b. Mehmed ile Veled-i Karabaş mahallesinde merkūm Abdi Çelebi b. Mehmed li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Saraç Solak Mehmed Çelebi b. <> Receb b. Abdullah’ın imzâ ve hatmi ile mümzâ ve mahtûm işbu iki kıt‘a deyn temessükü nâtık olduğu üzere müdde‘î-i merkūm el-Hâc Mustafa b. el-Hâc Mehmed yedinden bir def‘a beş yüz yetmiş beş esedî guruş ve bir def‘a yüz esedî guruş ki cem‘an altı yüz yetmiş beş esedî guruş merkūm <> el-Hâc Mustafa yedinden huzûrumuzda iktirâz ve tesellüm ve kabz ve mesârifine sarfla [istihlâk] etmekle meblağ-ı mecmû‘-ı merkūm müdde‘î-i mezbûra vâcibü’l-edâ deynidir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an irsâl olunan Hasan Çelebi b. Abdullah ve Mehmed b. Ahmed ile meclis-i şer‘a gelip vukū‘u üzere inhâ ve takrîr etmeğin mâ-vaka‘a bi’t-taleb ketb olundu. Fî gurreti Rebî‘i’l-âhir li-seneti aşer ve mi’ete ve elf. Şuhûdü’l-hâl: Mehmed Ağa b. Hüseyin, el-Hâc İsmail b. Mehmed, Ahmed Çelebi b. Ali, Mehmed Çelebi b. Receb, Mehmed Çelebi b. Şa‘bân.