Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 687 Hüküm no: 546 Orijinal metin no: [127b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi’nin babasından kalan evdeki hissesini annesi Kaya Hatun’a sattığı Husûs-ı âti’l-beyânın mahallinde ketb ü tahrîr iltimâs olunmağın kıbel-i şer‘-i mutahhardan me’zûnen Mevlânâ Abdurrahman Efendi b. el-mevlâ el-merhûm Ahmed Efendi irsâl olunup ol dahi mahmiye-i İstanbul’da Balat kapısı dâhilinde Molla Aşkī mahallesinde sâkin iken bundan akdem vefât eden eş-Şeyh Mustafa Efendi b. Mehmed b. Hüseyin Efendi’nin menziline varıp zeyl-i kitâbda isimleri mastûr Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Kaya Hatun bt. Abdulkadir Efendi’ye ve kebîr oğlu İbrahim Çelebi’ye ve müteveffâ-yı mezbûrun firâşından mezbûre Kaya Hatun’un batnında mütebeyyen hamle münhasıra oldukdan sonra mezbûr İbrahim Çelebi meclis-i ma‘kūd-ı mezbûrda zâtı mahalle-i mezbûre ahâlîsinden İmâm Yusuf Efendi b. Abdullah ve İsmail Çelebi b. Abdulkadir Efendi ta‘rîfleri ile mu‘arrefe olan bâ‘isetü’l-kitâb Kaya Hatun mahzarında ikrâr ve i‘tirâf edip babam müteveffâ-yı mezbûrun terekesi tahrîr olundukda tereke-i menkūlesinin esmânı on iki bin yedi yüz sağ akçeye bâliğ olup ve mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd nısf menzilinin dahi kıymeti ba‘de’t-takvîm yirmi yedi bin akçede vâlidem mezbûre Kaya Hatun üzerinde karâr ettikden sonra zikr olunan on iki bin yedi yüz sağ akçenin on iki bin akçesi vâlidem Kaya Hatun’a mehr-i müeccel-i müsbeti içün verilip ve yedi yüz akçesi resm-i kısmet ve sâir mesârifa sarf olundukdan sonra menzil-i mezkûrun sümün-ı şâyi‘i vâlidem mezbûrenin ve sümünden bâkī kalan menzilin dahi nısfı mevkūfen haml-i mezbûr içün kalıp ve nısf-ı şâyi‘-i âharı dahi bana isâbet etmekle ben dahi nısf-ı şâyi‘ âhar hakkımı vâlidem mezbûreye tarafeynden îcâb ve kabûlü hâvî şurût-ı müfsideden ârî on iki bin sağ akçeye bey‘ ve teslîm ol dahi iştirâ ve tesellüm edip semeni olan meblağ-ı merkūm on iki bin akçeyi yedinden tamâmen alıp kabz eyledim ba‘de’l-yevm dâhil-i defter ve hâric ez-defter tereke-i menkūleden ve menzil-i mezkûreden hisseme isâbet eden cemî‘ mîrâs da‘vâsından vâlidem mezbûrenin zimmetini ibrâ-i âmm-ı katı‘u’n-nizâ‘ ile ibrâ eyledim dedikde gıbbe’t-tasdîk mezbûre Kaya Hatun dahi meclis-i ma‘kūd-ı mezbûrda oğlu mezbûr İbrahim Çelebi mahzarında ikrâr ve takrîr-i kelâm edip ben dahi dâhil-i defter ve hâric ez-defter terekeden hisseme isâbet eden cemî‘ mîrâs da‘vâsından oğlum mezbûr İbrahim Çelebi’nin zimmetini ibrâ-i âmm-ı katı‘u’n-nizâ‘ ile ibrâ ve ıskāt eyledim dedikde gıbbe’t-tasdîk vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan Mehmed Çelebi b. Ahmed ve Ahmed Çelebi b. Ali ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd şüd. Fî 16 Cumâdelûlâ sene 1110. Şuhûdü’l-hâl: Hasan Efendi b. Mustafa, el-Hâc Ali b. Mustafa, el-Hâc Ahmed b. Davud, el-Hâc Şa‘bân b. Abdullah