Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 700 Hüküm no: 561 Orijinal metin no: [130b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcu terekesinden fazla olarak vefat eden Abdurrahimzade Mehmed Efendi’nin alacaklılarının terekeden talepleri Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘-i enverden me’zûnen Mevlânâ Mehmed Efendi b. el-Hâc Sunullah irsâl olunup ol dahi mahmiye-i İstanbul’da Mimârsinan mahallesinde sâkin iken düyûnu terekesinden ezyed olduğu halde vefât eden Abdurrahimzâde demekle şehîr Mehmed Efendi b. el-müvellâ el-merhûm el-mağfûrun-leh Kādıasker Mehmed Efendi’nin hayâtında sâkin olduğu menzile varıp zeyl-i kitâbda mastûrü’l-esâmî Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Çıkrıkçı Kemâl mahallesinde sâkin es-Seyyid Mustafa Çelebi b. es-Seyyid Mehmed Çelebi meclis-i ma‘kūd-ı mezbûrda müteveffâ-yı mezbûr Mehmed Efendi’nin veresesi terekesinden kasr-ı yed etmekle tesviye-i umûruna kıbel-i şer‘den vasî ve kayyım nasb olunup bi-hasebi’l-vesâye terekesine vaz‘-ı yed eden Mehmed Efendi b. Halil mahzarında üzerine da‘vâ ve takrîr-i kelâm edip müteveffâ-yı mezbûr Abdurrahimzâde demekle şehîr Mehmed Efendi el-müvellâ el-merhûm Kādıasker Mehmed Efendi zimmetinde cihet-i karzdan üç guruş ve benden iştirâ eylediği lahm-ı ganem bahâsından yirmi sekiz guruş dört para min-haysü’l-mecmû‘ otuz bir guruş dört para hakkım olup hattâ hâl-i kemâl-i sıhhatinde zimmetinde reddi vâcib ol mikdâr guruş dört para bana deyni olduğunu huzûr-ı Müslimînde ikrâr ve işhâd edip kable’l-edâ fevt olmağla tereke-i kāsırasından taleb ederim suâl olunsun dedikde yine mahmiye-i mezbûrede Hoca Üveys mahallesinde sâkin Kahveci el-Hâc İbrahim b. İbrahim meclis-i ma‘kūd-ı mezbûrda vasiyy-i mezbûr mahzarında üzerine da‘vâ ve takrîr-i kelâm edip müteveffâ-yı mezbûr Abdürrahimzâde Mehmed Efendi b. el-merhûm Kādıasker Mehmed Efendi zimmetinde cihet-i karzdan on beş guruş ve benden iştirâ eylediği kahve ve mum bahâsından ba‘de külli’l-hesâb otuz guruş min-haysü’l-mecmû‘ kırk beş guruş hakkım olup hattâ hâl-i kemâl-i sıhhatinde bana ol kadar guruş deyni olduğunu huzûr-ı Müslimînde ikrâr ve işhâd ettikden sonra meblağ-ı merkūmun beş guruşunu yedinden ahz u kabz edip meblağ-ı bâkīyi kable’l-edâ fevt olmağla tereke-i kāsırasından taleb ederim suâl olunsun dedikde yine mahmiye-i mezbûrede Kür[kçü]başı? mahallesinden Kasab Hüseyin Çelebi b. Osman meclis-i ma‘kūd-ı mezbûrda vasiyy-i mezbûr mahzarında üzerine da‘vâ ve takrîr-i kelâm edip müteveffâ-yı mezbûr Abdurrahimzâde Mehmed Efendi zimmetinde cihet-i karzdan on guruş hakkım olup hattâ hâl-i kemâl-i sıhhatinde ber-vech-i muharrer bana ol kadar guruş zimmetinde lâzımü’l-edâ deyni olduğunu huzûr-ı Müslimînde ikrâr ve işhâd dahi edip kable’l-edâ fevt olmağla tereke-i kāsırasından taleb ederim suâl olunsun dedikde yine mahmiye-i mezbûrede Samanveren mahallesinden Bakkāl Mehmed Çelebi b. Mustafa meclis-i ma‘kūd-ı mezbûrda vasiyy-i mezbûr mahzarında üzerine da‘vâ ve takrîr-i kelâm edip müteveffâ-yı mezbûr Abdürrahimzâde Mehmed Efendi zimmetinde benden iştirâ ve kabz eylediği yağ ve bal bahâsından ba‘de külli’l-hesâb iki bin dört yüz sağ akçe hakkım olup hattâ hâl-i kemâl-i sıhhatinde ber-vech-i muharrer bana ol kadar akçe deyni olduğunu huzûr-ı Müslimînde ikrâr ve işhâd dahi edip kable’l-edâ fevt olmağla terekesinden taleb ederim suâl olunsun dedikde yine zikr olunan Mimârsinan mahallesinden müteveffâ-yı mezbûrun kebîr oğlu Mehmed Efendi meclis-i ma‘kūd-ı mezbûrda vasiyy-i mezbûr mahzarında üzerine da‘vâ ve takrîr-i kelâm edip müteveffâ-yı mezbûr babam Abdurrahimzâde Mehmed Efendi zimmetinde cihet-i karzdan doksan altı guruş hakkım olup hattâ hâl-i kemâl-i sıhhatinde huzûr-ı Müslimînde bana ol kadar guruş deyni olduğunu ikrâr ve işhâd edip kable’l-edâ fevt olmağla tereke-i kāsırasından taleb ederim suâl olunsun dedikde yine mahmiye-i mezbûrede Molla Hüsrev mahallesinden Uncu Ömer b. Ali meclis-i ma‘kūd-ı mezbûrda vasiyy-i mezbûr mahzarında üzerine da‘vâ ve takrîr-i kelâm edip müteveffâ-yı mezbûr zimmetinde benden iştirâ ve kabz eylediği un bahâsından bin seksen beş akçe hakkım olup hattâ hâl-i kemâl-i sıhhatinde cihet-i mezbûreden zimmetinde reddi vâcib bana ol kadar sağ akçe deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr zikr olunan müdde‘îlerden sıdk-ı makāllerine beyyine taleb olundukda udûl-ı Müslimînden müteveffâ-yı mezbûrun etbâ‘ından Ali b. Nasuh ve Hasan Efendi b. Şa‘bân li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Abdurrahimzâde Mehmed Efendi b. el-müvellâ el-merhûm Kādıasker Mehmed Efendi hâl-i kemâl-i sıhhatinde müdde‘î-i mezbûr es-Seyyid Mustafa Çelebi’ye cihet-i mezbûreden otuz bir guruş dört para ve müdde‘î-i mezbûr Kahveci el-Hâc İbrahim’e kırk beş guruş ve müdde‘î-i mezbûr Kasab Hüseyin Çelebi’ye on guruş ve müdde‘î-i mezbûr Bakkāl Mehmed Çelebi’ye iki bin dört yüz sağ akçe ve müdde‘î-i mezbûr kebîr oğlu Mehmed Efendi’ye altı guruş ve müdde‘î-i mezbûr Uncu Ömer Çelebi’ye bin seksen beş sağ akçe deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde gıbbe’t-ta‘dîl ve’t-tezkiye şehâdetleri makbûle olmağın zikr olunan müdde‘îler vech-i şer‘î üzere ba‘de’t-tahlîf mûcebiyle ba‘de’l-hükm vâki‘ hâli müteveffâ-yı mezbûr mahallinde keşf ve tahrîr ba‘dehû ma‘an ba‘s olunan Hasan Çelebi b. Abdullah ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd şüd. Fî 28 min-Rebî‘ülâhir sene 1110. Şuhûdü’l-hâl: Umdetü’l-müderrisîn Abdürrahimzâde Ahmed Efendi, el-Hâc Hasan Bey b. Musa, el-Hâc Bekir b. Cafer, Mustafa Efendi b. Ali