Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 724 Hüküm no: 579 Orijinal metin no: [134b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa’nın kızı Hatice’nin vasisi Ali Bey’in yerine Ayşe Hatun’un tayini Mahmiye-i İstanbul’da Şeyh Ebulvefâ mahallesi ahâlîsinden olup medîne-i Belgrad’da bundan akdem vefât eden Hasan Ağa b. İbrahim Ağa b. Abdülkerim’in sulbiye sagīre kızı Hadîce’nin tesviye-i umûruna ve müteveffâ-yı mezbûrun zevce-i menkûha-i metrûkesi Âişe Hatun bt. Abdullah’ın batnında mütebeyyin hamlin hisse-i mevkūfesini zabt u hıfza vasiyy-i muhtâr olan Ali Bey b. Mehmed adl-i gayr-ı kâfî olmağla kıbel-i şer‘den bir vasî zam ve nasb olunmak lâzım ve mühim olmağın emânet ve diyânet ile ma‘rûfe olup her vechile vesâyet uhdesinden gelmeye kādire idiği zeyl-i kitâbda muharrerü’l-esâmî Müslimîn ihbârları ile lede’ş-şer‘i’l-enver zâhir ve müte‘ayyen olmağın râfi‘atü’l-kitâb Âişe Hatun bt. Abdullah’ı hâkim-i muvakkı‘-ı sadr-ı kitâb efendi hazretleri mezbûre Âişe Hatun’u sagīre-i mezbûrenin ve haml-i mezbûrun tesviye-i emrlerine zam ve nasb ve ta‘yîn buyurdukları kayd şüd. Fî gurreti Cumâdelâhir sene 1110. Şuhûdü’l-hâl: Abdullah Ağa b. Mehmed, Mustafa Ağa b. Mehmed, İbrahim Ağa b. Mehmed, İbrahim Çelebi b. Mehmed