Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 739 Hüküm no: 597 Orijinal metin no: [137b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Abdullah’ın varislerinin evdeki hisselerini yine varislerden Ahmed’e sattıkları Mahmiye-i İstanbul’da Kefevî mahallesinde sâkine iken bundan akdem vefât eden Nakkaş el-Hâc İbrahim b. Abdullah’ın verâseti zevce-i menkûha-i metrûkesi Emetullah Hatun bt. İbrahim ile sulbî sagīr oğlu Halil ve kebîr oğulları el-Hâc Ahmed ve Mustafa’ya ve kebîre kızı Havva’ya münhasıra ve tashîh-i meselesi sekiz sehmden olup sihâm-ı mezbûrenin bir sehmi zevcesi mezbûreye ve bâkī yedi sehmin ikişer sehmi oğulları mezbûrlardan her birine ve bir sehmi kızı mezbûre Havva’ya isâbet ve intikāl eylediği şer‘an zâhir oldukdan sonra zâtı mahalle-i mezbûre sükkânından Müezzin Mahmud Çelebi b. Mustafa’ya ve Kayyım el-Hâc Mustafa b. Mehmed ta‘rîfleriyle mu‘arrefe olan zevcesi mezbûre Emetullah asâleten ve kebîre kızı mezbûre Havva Hatun ibneti’l-mezbûr el-Hâc İbrahim b. Abdullah tarafından husûs-ı âti’l-beyânda vekîl olduğu zât-ı mezbûreyi ma‘rifet-i şer‘iyye ile ârifân mu‘arrifân-ı mezbûrân Mahmud Çelebi ve el-Hâc Mustafa şehâdetleriyle mahzar-ı hasm-ı câhidde sâbit ve sübût-ı vekâlete hükm-i şer‘î lâhık olan zevci İsmail Beşe b. İskender vekâleten ve kebîr oğlu mezbûr Mustafa asâleten meclis-i şer‘de diğer kebîr oğlu râfi‘ü’l-kitâb mezbûr el-Hâc Ahmed mahzarında her biri ikrâr ve takrîr-i kelâm edip akd-i âtî sudûruna değin mûrisimiz müteveffâ-yı mezbûrun mülk ve hakkı olduğu müsbet olup mahalle-i mezbûrede vâki‘ bir tarafdan Bayram Beşe mülkü ve iki tarafdan tarîk-i âm ve bir tarafdan Kamri nâm zimmî mülkü ile mahdûd üç bâb fevkānî oda ve iki bâb tahtânî oda ve bir ahır ve bir su kuyusu ve kenîf ve zât-ı eşcâr-ı müsmire ve gayr-ı müsmire bahçeyi müştemil mülk menzilden tashîh-i mezbûr üzere bize isâbet eden dört sehm-i şâyi‘imizi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i kat‘î ile on iki bin altı yüz seksen sağ akçe mukābelesinde mezbûr el-Hâc Ahmed’e bey‘ ve teslîm ol dahi ber-vech-i muharrer iştirâ ve tesellüm ve kabûl edip semeni olan meblağ-ı mezbûr on iki bin altı yüz seksen sağ akçeyi yedinden bi-kadri’l-hısâs tamâmen alıp kabz eyledik ba‘de’l-yevm menzil-i mezbûrda olan dört sehm-i şâyi‘amız mezbûr el-Hâc Ahmed’in mülk-i müşterâsıdır dediklerinde gıbbe’t-tasdîkı’ş-şer‘î sagīr-i mezbûrun vasiyy-i mansûbu ve vâlidesi mezbûre Emetullah meclis-i şer‘de müşteri-yi mezbûr el-Hâc Ahmed mahzarında bi’l-vesâye ikrâr ve takrîr-i kelâm edip verese-i kibâr ve ben sümün hissemizi menzil-i mezbûrdan tashîh-i mezbûr üzere dört sehm-i şâyi‘amızı mezbûr el-Hâc Ahmed’e bey‘ ve teslîm ettiğimizden sonra sagīr-i mezbûrun iki sehm-i şâyi‘ini bir vechile ifrâz mümkün olmamağla bi’l-izni’ş-şer‘î iki sehm-i şâyi‘i sûk-ı sultânîde ve mecma‘-ı nâs olan mevâzi‘-i adîdede münâdîlerden Mustafa b. İbrahim nâm münâdî yediyle kırk gün mikdârı müdâvemet ile olup rağabât-ı nâs bi’l-külliye münkatı‘a oldukdan sonra mezbûr el-Hâc Ahmed üzerinde iki bin üç yüz kırk sağ akçede karâr edip ziyâde ile tâlib-i âhar zuhûr etmediğinden gayrı meblağ-ı mezbûr iki sehm-i şâyi‘ini yevm-i akidde semen-i misli olduğunu ve sagīr-i mezbûrun zarûret-i nafakası olduğu mahalle-i mezbûre sükkânından İmâm Ahmed Efendi b. Mehmed ve Üstâd Ali b. İbrahim ve es-Seyyid Feyzullah Çelebi b. Süleyman ve Hasan Efendi b. Hüseyin nâm kimesneler haberleriyle sâbit ve mukarrer olmağın ben dahi zikr olunan iki sehm-i şâyi‘i bi-cümleti’t-tevâbi‘ ve’l-levâhık tarafeynden îcâb ve kabûlü [hâvî] bey‘-i kat‘î ile altı bin üç yüz kırk akçe mukābelesinde mezbûr el-Hâc Ahmed’e bey‘ ve teslîm ol dahi iştirâ ve tesellüm edip semeni olan meblağ-ı mezbûru yedinden tamâmen ahz u kabz eyledim ba‘de’l-yevm menzil-i mezbûrun sekiz sehm-i şâyi‘inin altı sehmi şirâen ve iki sehmi irsen mezbûr el-Hâc Ahmed’in mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb şüd. Fî 26 min-Cumâdelûlâ sene 1110. Şuhûdü’l-hâl: Ahmed Ağa b. İsmail, Abdullah b. Ali, Abdurrahman Çelebi b. Abdülbaki Efendi, Abdullah Çelebi b. Abdülbaki Efendi