Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 775 Hüküm no: 626 Orijinal metin no: [144b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Muharrem Efendi’nin Mustafa b. Mehmed’e borcu olduğu Mahmiye-i İstanbul’da Yarhisar mahallesi sükkânından olup işbu sene-i mübârekede Medîne-i münevvere kādısı iken vedâ‘-ı âlem-i fânî eden merhûm Muharrem Efendi b. Mustafa Efendi’nin verâseti zevce-i menkûha-i metrûkesi fahrü’l-muhadderât Şerife Âişe Hatun bt. el-müvellâ el-merhûm Nakībü’l-eşrâf es-Seyyid Cafer Efendi ile sulbiye sagīre kızı Şerife Ümmügülsüm’e ve li-eb er karındaşı Ahmed Ağa’ya münhasıra oldukdan sonra kasaba-i Kasımpaşa’da el-Hâc Hasan mahallesinde sâkin bâ‘isü’l-kitâb Acemzâde demekle ma‘rûf Kavukçu el-Hâc Mustafa b. Mehmed merhûm-ı mûmâ-ileyhin zikr olunan Yarhisar mahallesinde vâki‘ menzilinde akd olunan meclis-i şer‘de merkūm-ı müşârün-ileyhin terekesine vâzı‘u’l-yed olup sagīre-i mezbûrenin vâlidesi ve tesviye-i umûruna taraf-ı şer‘den mansûbe vasiyesi mezbûre Şerife Âişe Hatun tarafından husûs-ı âti’l-beyânda vekîl-i müsecceli olan fahrü’l-müderrisîn Murad Efendi b. Ali Efendi ve mezbûre Ahmed Ağa mahzarlarında üzerlerine da‘vâ ve takrîr-i kelâm edip yedimde olan işbu mümzâ ve mahtûm deyn temessükü nâtık olduğu üzere merhûm-ı mûmâ-ileyh Muharrem Efendi b. Mustafa Efendi’ye Medîne-i münevvereye gider oldukda kendi malımdan iki bin guruş ikrâz ve teslîm ol dahi iktirâz ve tesellüm ve kendi mesârifine sarfla istihlâk edip hattâ bin yüz dokuz Recebi’l-ferdinin on üçüncü gününde meblağ-ı mezbûr iki bin guruş cihet-i karzdan bana vâcibü’l-edâ deyni olduğunu huzûr-ı Müslimînde ikrâr ve işhâd edip ve meblağ-ı mezbûr iki bin guruş deyni mukābelesinde yedinde mülk ve hakkı olup esâmîleri işbu imzâlı defterde mastûre sagīr ve kebîr iki yüz elli üç aded kitâb alay kütübü ta‘bîr olunur altmış bir sagīr kitâbı dahi dört sandığa vaz‘ ve mecmû‘u sandıklarıyla ma‘an bana rehin vaz‘ ve teslîm ben dahi irtihân ve kabz ve hâlâ Kebeciler Hanı’nda vâki‘ kendi cânibinde mahzenimde hıfz içün vaz‘ etmiş idim. El-hâletü hâzihi kable’l-edâ ve’l-kabz mûmâ-ileyh Muharrem Efendi vefât etmekle mûmâ-ileyhimâ Murad Efendi ve Ahmed Ağa’ya suâl olunup edâ-i deyn ve fekk-i rehne tenbîh olunmaları matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda merhûm mûmâ-ileyhin mülâzımlarından ve mahmiye-i mezbûrede el-Hâc Osman Efendi b. Mehmed Efendi ve hayâtında kethüdâsı olan el-Hâc İbrahim Çelebi b. Ahmed li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu sene-i mübârekede Medîne-i münevvere kādısı iken vefât eden merhûm-ı mûmâ-ileyh Muharrem Efendi b. Mustafa Efendi Medîne-i münevvereye gider oldukda işbu müdde‘î-i mezbûr el-Hâc Mustafa’dan deyn temessükü mûcebince iki bin guruş ikrâz ve kabz ve kendi mesârifine sarfla istihlâk edip ve meblağ-ı mezbûr iki bin guruşa cihet-i karzdan müdde‘î-i mezbûr el-Hâc Mustafa’ya vâcibü’l-edâ zimmetinde deyni olduğunu bin yüz dokuz senesi Recebi’l-ferdinin on üçüncü gününde bizim huzûrumuzda ikrâr ve bizi işhâd eyledi ve meblağ-ı mezbûr iki bin guruş deyni mukābelesinde yedinde mülk ve hakkı olup esâmîleri işbu imzâlı defterde mastûr sagīr ve kebîr iki yüz elli üç aded kitâbı ve alay kütübü ta‘bîr olunur altmış bir sagīr kitâbını dört sandığa vaz‘ ve mecmû‘unu sandıklarıyla ma‘an kezâlik huzûrumuzda dâyin-i mezbûr el-Hâc Mustafa’ya rehine vaz‘ ve teslîm ol dahi irtihân ve kabz dükkân-ı mezbûrda vâki‘ mahzeninde hıfz eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olup müdde‘î-i mezbûr el-Hâc Mustafa tahlîf-i şer‘î ile tahlîf olundukdan sonra mûcebince ba‘de’l-hükm ve’t-tenbîh mâ-vaka‘a kayd şüd. Fî 3 min-Cumâdelâhire sene 1110. Şuhûdü’l-hâl: Sâbıkā İzmir Kādısı Müftüzâde es-Seyyid Mehmed Efendi, fahrü’l-müderrisîn Abdullah Efendi, İbrahim Ağa b. (°), el-Hâc Süleyman b. Abdullah