Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 777 Hüküm no: 628 Orijinal metin no: [145a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Çavuş’un varislerinden Ayşe Hatun’un mirastan hakkını aldığı Husûs-ı âti’z-zikrin mahallinde ketb ü tahrîri iltimâs olunmağın savb-ı şer‘den me’zûnen irsâl olunan Mevlânâ Mehmed Efendi b. Ali mahmiye-i İstanbul’da Öksüzce mahallesinde sâkin Mehmed Çelebi b. Halil’in menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahalle-i mezbûre ahâlîsinden olup vilâyet-i Rumeli’nde Semendire kasabasında müsâfiren vefât eden Mehmed Çavuş b. Yahya b. İslâm’ın verâseti li-ebeveyn kız karındaşı olup vilâyet-i Anadolu’da Akçaşehir kazâsına tâbi‘ Haslı karyesinde sâkine Âişe Hatun bt. el-mezbûr Yahya nâm gāibe ve li-ebeveyn ammi oğulları Mustafa Beşe ve Mehmed Beşe ibney Sunullah b. İslâm’a münhasıra ve tashîh-i meselesi dört sehmden olmağla sihâm-ı mezbûrenin iki sehmi gāib-i mezbûre Âişe Hatun’a ve bâkī iki sehmin birer sehmi mezbûr Mustafa ve Mehmed Beşe’den her birine isâbeti tahakkukundan sonra mezbûre Âişe Hatun bt. el-mezbûr Yahya b. İslâm tarafından husûs-ı âti’l-beyânda da‘vâ ve taleb ve ahz u kabz ve ibrâ ve kendüye îsâle vekîl olduğu zât-ı mezbûreyi ma‘rifet-i şer‘iyye ile ârifân mahalle-i mezbûrede sâkin Ahmed Beşe b. Derviş ve Ebubekir Beşe b. Ali şehâdetleriyle mahzar-ı hasm-ı câhidde nâib ve sübût-ı vekâletine hükm-i şer‘î lâhık olan Ahmed Beşe b. Osman meclis-i ma‘kūd-ı mezbûrda müteveffâ-yı mezbûrun terekesine bi’l-verâse ve bi’l-emâne vaz‘-ı yed eden hâfızü’l-kitâb mezbûr Mehmed Çelebi b. Halil mahzarında bi’l-vekâle ikrâr ve takrîr-i kelâm edip müteveffâ-yı mezbûr Mehmed Çavuş zevcesi Âişe Hatun bt. Halil’in terekeleri tahrîr olunup ba‘de ihrâci’l-mesârif tashîh-i mezbûr üzere para dört akçe hesâbı üzere müvekkilem mezbûre defter-i kassâm-ı askerîde tahrîr olunan Mehmed Çavuş’un terekesinden on üç bin yedi yüz kırk üç akçe ve zevcesi mezbûre Âişe’nin terekesinden sekiz bin beş yüz akçe cem‘an yirmi bin iki yüz kırk üç akçe hakkını mezbûr Mehmed Çelebi yedinden tamâmen ahz u kabz eyledim meblağ-ı merkūmdan mezbûr Mehmed Çelebi b. Halil yedinde bir akçe ve bir habbe bâkī kalmadı, hukūk-ı mîrâsa ve gayre müte‘allıka da‘vâdan mezbûr Mehmed Çelebi’nin ve vâlidesi mezbûre Âişe Hatun’un zimmetlerini ibrâ-i âm ile ibrâ ve ıskāt eyledim dedikde gıbbe’t-tasdîk vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Çukadâr el-Hâc Süleyman b. Abdullah ve Hüseyin Çelebi b. Mehmed ile meclis-i şer‘a gelip vukū‘u üzere inhâ ve takrîr etmeğin mâ-vaka‘a bi’t-taleb ketb şüd. Fî 8 min-Cumâdelâhire sene 1110. Şuhûdü’l-hâl: Ahmed Çelebi b. Abdullah, İbrahim Çelebi b. Süleyman, Şa‘bân b. Osman, Mehmed Beşe b. el-Hâc Mehmed, Ahmed Çelebi b. Mehmed