Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 782 Hüküm no: 633 Orijinal metin no: [146a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hasan Bey’in küçük çocuklarına kalan evin satılmasının onlar için daha uygun olduğu Mahmiye-i İstanbul’da Bahçekapısı kurbünde Hobyar mahallesi ahâlîsinden olup bundan akdem vilâyet-i Rumeli’nde Tarama Zâbiti iken vefât eden bostânî mütekā‘idlerinden Hasan Bey b. Abdullah b. Abdullah’ın sagīre kızları Hafife ve Fâtıma ve Âişe’nin üvey vâlideleri ve tesviye-i emrlerine kıbel-i şer‘-i enverden vasiye-i mansûbeleri olup zâtı mahalle-i mezbûrede sâkin Halil Efendi b. Ahmed ve Mustafa Bey b. Ömer ta‘rîfleriyle mu‘arrefe olan hâfızü’l-kitâb Şahbaz Hatun bt. Abdullah ile müteveffânın âhar sagīre kızı Havva’nın üvey vâlidesi ve tesviye-i umûruna kıbel-i şer‘den mansûbe vasiyesi olup zâtı mu‘arrifân-ı mezbûrân ta‘rîfleriyle mu‘arrefe olan Hadîce bt. Abdullah nâm hatun meclis-i şer‘-i şerîf-i enverde her biri bi’l-vesâye ikrâr ve takrîr-i kelâm edip müteveffâ-yı mezbûr Hasan Bey’in ile’l-vefât icâreteyn-i ma‘lûmeteyn ile taht-ı icâresinde olup ba‘de vefâtihî intikāl-i âdî ile kızları mezbûrelere intikāl eden mahalle-i mezbûrede vâki‘ bir tarafdan ba‘zan Kasab el-Hâc Mustafa menziline ve ba‘zan İsmail Beşe menziline ve iki tarafdan tarîk-i âmma müntehî dâhiliyesinde tabaka-i ulyâda iki bâb oda ve iki sofa ve cihânnümâ ve vüstâda iki bâb oda ve iki sofa ve tahtânî bir hamam ma‘a câmekân ve bir matbah ve kilâr ve havluyu ve hâriciyesinde dahi tabaka-i ulyâda iki bâb oda ve bir sofa ve bir mâ-beyn odası ve vüstâsında iki bâb oda ve bir sofa ve tahtında bir ahır ve samanlık ve havluyu müştemil merhûm Mustafa Çavuş Vakfı’na beher şehr doksan akçe icâreli Kılıç Ali Paşa Vakfı ile mahlût vakıf menzil ânen fe-ânen harâba müşrif ve hâsılı harcına vefâ etmeyip ve beher şehr icâre-i müeccelesi cânib-i vakfa verilmek sagīreler haklarında muzırra olmağla zikr olunan müşterek menzil ba‘de’l-müzâyede ve ınkıtâ‘i’r-rağbet bedel-i misli ile bi’l-izni’ş-şer‘ ve ma‘rifet-i mütevellî âhara ferâğ ve tefvîz ve bedeli vech-i şer‘î üzere i‘mâl olunup hâsıl olan nemâsı sagīrelerin levâzımlarına harc ü sarf olunmak sagīreler haklarında nef‘-i mahz olmağın vechi meşrûh üzere ferâğa yedlerimize izin taleb ederiz dediklerinde zikr olunan vasiyelerin takrîr-i meşrûhları vâkı‘a mutâbık olduğu mahalle-i mezbûrede sâkin mu‘arrifân-ı mezbûrân Halil Efendi b. Ahmed ve Mustafa Bey b. Ömer ve İbrahim Efendi b. Hüseyin ve Ali Hoca b. Ahmed ve el-Hâc Veli Ağa b. Musa ve İsmail Bey b. İbrahim nâm kimesneler haberleriyle lede’ş-şer‘i’ş-şerîf mütebeyyen olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri vech-i muharrer üzere menzil-i mahdûd-ı mezkûru bedel-i misli ile ba‘de’l-müzâyede ve ınkıtâ‘i’r-rağbet bâ-ma‘rifet-i mütevellî âhara ferâğ ve tefvîze ve sagīre-i mezbûre Şahbaz ve Hadîce nâm hatunlara izin verilmeğin mâ-hüve’l-vâki‘ bi’t-taleb ketb olundu. Fî gurreti Cumâdelûlâ li-sene aşer ve mi’e ve elf. Şuhûdü’l-hâl: el-Hâc Abdurrahman Efendi b. Mustafa, Abdurrahman Efendi b. Abdürrezzak, el-Hâc Mustafa b. Mehmed, İbrahim Çelebi b. Mustafa, Mehmed Beşe b. Hüseyin, Çukadâr Mehmed Bey b. Hüseyin, Pazarcı İbrahim Beşe b. Mehmed, Pazarcı Mustafa Bey b. Murtaza, Yusuf Bey b. Abdullah ve gayruhum