Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 789 Hüküm no: 635 Orijinal metin no: [147a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Fatıma’dan çocuklarına kalan eski vakıf evin satılmasının çocuklar için daha faydalı olduğu Mahmiye-i İstanbul’da Kocamustafapaşa kurbünde sâkine iken bundan akdem vefât eden Fâtıma bt. Mustafa Ağa’nın oğulları Ahmed ve Mustafa nâm sagīrlerin babaları ve tesviye-i emrlerine vasiyy-i muhtârları bâ‘isü’l-kitâb Hasan Ağa b. Mustafa mahfil-i kazâda bi’l-vesâye ikrâr edip müteveffât-ı mezbûrenin ile’l-vefât icâreteyn-i ma‘lûmeteyn ile taht-ı icâresinde olup ba‘de vefâtihâ intikāl-i âdî ile oğulları mezbûrâna intikāl eden Kocamustafapaşa kurbünde vâki‘ bir tarafadan câmi‘-i şerîf mihrâbı önünde olan sarnıç bahçesine ve bir tarafdan dahi Alizâde hânesine ve bir tarafdan el-Hâc Ali ve Aşçı Bayram menzillerine ve bir tarafdan vakf-ı mezbûr duvarı ve imâret ve tabhhâneye müntehî büyût-ı adîdeyi muhtevî Kocamustafapaşa Vakfı’ndan olan menzil ânen fe-ânen harâba müşrif ve hâsılı harcına vefâ etmeyip ve ta‘mîr-i termîmine dahi sagīrlerin malları olmamağla zikr olunan vakıf menzil bi’l-izni’ş-şer‘î ve ma‘rifet-i mütevellî bedel-i misli ile ba‘de’l-müzâyede ve inkıtâ‘i’r-rağbet âhara ferâğ ve tefvîz ve bedel-i ferâğ vech-i şer‘î üzere i‘mâl olunup hâsıl olan semeni sagīrlerin levâzımına harc ü sarf olunmak sagīrlere nef‘-i mahz olmağla vech-i meşrûh üzere ferâğa kıbel-i şer‘den me’zûn olmak matlûbumuzdur dedikde vasiyy-i mezbûrun takrîr-i meşrûhu takrîre [vâkı‘a] mutâbık olmağın zikr olunan Kocamustafapaşa mahallesinden İmâm Nurullah Efendi b. Abdurrahman ve Abdurrahman Efendi b. Receb v. Mehmed Efendi b. İbrahim ve Mehmed Çelebi b. Abdurrahman nâm kimesneler haberleriyle lede’ş-şer‘i’ş-şerîf mütebeyyen olmağın hâkim-i muvakkı‘-ı sadr-ı kitâb efendi hazretleri menzil-i mevkūf-ı mezbûru vech-i muharrer üzere bâ-ma‘rifet-i mütevellî âhara bedel-i misli ile ferâğ ve tefvîze vasiyy-i mezbûr Hasan Ağa’ya izin verilmeğin mâ-vaka‘a bi’t-taleb ketb şüd. Fî 20 min-Cumâdelûlâ sene 1110. Şuhûdü’l-hâl: el-Hâc Mustafa Efendi b. Mehmed, Mustafa Çelebi b. Abdülfettah, İbrahim Ağa b. İsmail, Halil Çelebi b. Ahmed, İvaz b. Abdullah