Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 797 Hüküm no: 642 Orijinal metin no: [148b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Ağa’nın vefat eden Süleyman’ın vasisi olduğunu ispat ettiği Husûs-ı âti’l-beyânın mahallinde istimâ‘ ve tahrîri içün savb-ı şer‘den me’zûnen irsâl olunan Ahmed Şemî Efendi mahmiye-i İstanbul’da Süleymaniye mahallesinde sâkin Abdullah Çelebi b. Ahmed’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Nallı Mescid kurbünde Seydi Ağa mahallesinde sâkin iken bundan akdem vefât eden Süleyman b. İsmail Efendi’nin verâseti kebîr oğlu olup vilâyet-i Rumeli’nde Drama kazâsında sâkin Mehmed Çelebi’ye münhasıra oldukdan sonra müteveffâ-yı mezbûrun vech-i âtî üzere vasiyy-i muhtârı olduğunu iddi‘â eden Yusuf Ağa b. Abdullah meclis-i ma‘kūd-ı mezbûrda mütevefffa-yı mezbûrun mûde‘i mezbûr Abdullah Çelebi b. Ahmed mahzarında üzerine da‘vâ edip mezbûr Süleyman Ağa b. İsmail Efendi b. Abdullah fevtinden bir sene mukaddem bi-emrillâhi te‘âlâ nahb eylediğimde cemî‘ terekemi sen ahz u kabz eyleyip kazâ-i mezbûrede sâkin oğlum Mehmed’e îsâl eyle deyü huzûr-ı Müslimînde beni vasiyy-i muhtâr nasb edip ben dahi muvâcehesinde ba‘de’l-kabûl musırran alâ-îsâihî fevt olmağla tereke-i müteveffâ-yı mezbûrdan olup mezbûr Abdullah Çelebi yedinde emânet olan bir neftî çuka dolama ve bir sof çakşır ve bir neftî çuka ferâce ve bir don gömlek ve zıbın ve kırmızı keşmirî şal ve bir siyâh bogasi kapama ve bir alaca anteri ve bir yeşil çuka kaplı nâfe kürk ve bir kedi kürkü nîmten ve bir kırmızı çuka çakşır ve bir kavuk ve bir telli destâr ve bir arakiye ve iki aded kalembek ve tesbîh ve bir yaldızlı pirinç devât ve yaldızlı bakır(?) kuşak ve hırdavât ve bir yemenî ve bir sîm hâtem ve bir sîm çapkun raht ve bir kadife eğer ve bir çuka kesme ile yirmi beş guruşluk parayı mezbûr Abdullah Çelebi’den taleb eylediğimde bana teslîmden imtinâ‘ eder, suâl olunsun dedikde gıbbe’s-suâl mezbûr Abdullah Çelebi cevâbında eşyâ-i muharrere-i mezbûre ve meblağ-ı mezbûr ber-vech-i muharrer emânet olduğunu ikrâr lâkin müdde‘î-i mezbûrun müdde‘âsını inkâr edicek, müdde‘î-i mezbûrdan müdde‘âsına beyyine taleb olundukda udûl-ı Müslimînden olup zikr olunan Pîrî Ağa mahallesinde sâkin Ali Efendi b. Mahmud ve Şahin b. Abdullah li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Süleyman Ağa b. İsmail Efendi fevtinden bir sene mukaddem bi-emrillâhi te‘âlâ kazâen nahb eylediğimde işbu müdde‘î-i mezbûr Yusuf Ağa b. Abdullah cemî‘ terekemi sen ahz u kabz edip Vilâyet-i Rumeli’nde Drama kazâsında sâkin oğlum Mehmed’e teslîm eyle deyü ve huzûrumuzda vasiyy-i muhtâr eyledi ol dahi muvâcehesinde kabûl eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle oldukdan sonra mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an irsâl olunan el-Hâc Süleyman b. Abdullah ve Ahmed b. Süleyman ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd-şüd. Fî 16 min-Cemâziyelâhir sene 1110 Şuhûdü’l-hâl: İmâm Abdullah Efendi b. Mehmed, Abdülbaki Efendi b. Selim, Ahmed Ağa b. Abdullah, Mehmed Çelebi b. Mustafa.