Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 863 Hüküm no: 703 Orijinal metin no: [160a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âmine Hatun’un vefat eden eşi Hasan’da mehir alacağı olduğunu ispat ettiği Mahmiye-i İstanbul’da Murad Paşa mahallesinde sâkinen fevt olan el-Hâ[c] Hasan b. Ali’nin zevce-i menkûha-i metrûkesi olduğunu iddi‘â eden hâfizetü’l-kitâb Âmine Hatun bt. Abdullah ba‘de’t-ta‘rîf mahfil-i kazâda müteveffâ-yı mezbûrun evlâd-ı sıgārının tesviye-i emrlerine tashîhan li’s-sak vasî nasb olunan Hasan b. Mehmed mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Hasan b. Ali hâl-i kemâl-i sıhhatinde fevtinden üç ay mukaddem ümmü’l-veledi olduğum hâlde beni ba‘de’l-ıtk dört bin akçe mehr-i müeccel tesmiyesiyle tezevvüc ve kabûl edip mehr-i mezbûru kable’l-edâ fevt olmağla terekesinden taleb ederim dedikde gıbbe’s-suâl ve’l-inkâr müdde‘iye-i mezbûreden sıdk-ı makāline beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Çukur mahallede sâkin Mehmed Çelebi b. Mehmed ve Mustafa b. Abdullah li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr el-Hâc Hasan b. Ali târîh-i mezbûrda hâl-i kemâl-i sıhhatinde ümmü’l-veledi işbu müdde‘iye-i mezbûreyi ba‘de’l-ıtk dört bin akçe mehr-i müeccel tesmiyesiyle huzûrumuzda tezevvüc ve kabûl eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a kayd-şüd. Fî gurre-i Cumâdelûlâ sene 1110 Şuhûdü’l-hâl: eş-Şeyh Osman Efendi b. Mehmed, el-Hâc İdris Ağa b. Ahmed, Ahmed b. Süleyman, Hasan b. Abdullah, Mustafa Çelebi Haffâf, Mehmed b. Abdullah.