Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 871 Hüküm no: 710 Orijinal metin no: [161b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Çelebi’nin vefat eden Yorgancı Mustafa Çelebi’nin varisi olduğunu ispat edip hissesini teslim aldığı Husûs-ı âti’l-beyânın mahallinde istimâ‘ ve tahrîri içün savb-ı şer‘den me’zûnen irsâl olunan es-Seyyid İsmail Efendi b. el-merhûm es-Seyyid el-Hâc Ahmed Efendi mahmiye-i İstanbul’da Hoca Hayreddin mahallesinde sâkin es-Seyyid İbrahim Çelebi b. es-Seyyid Ahmed’in menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Debbâğ Yunus mahallesinde sâkin iken bundan akdem vefât eden Yorgancı Mustafa Çelebi b. Hüseyin’in zâhirde vâris-i ma‘rûfu olmamağla cemî‘ terekesi cânib-i beytülmâle âid oldukdan sonra mahmiye-i mezbûrda Keçeci Pîrî mahallesinde sâkin olup vech-i âtî üzere iddi‘â-i verâset eden bâ‘isü’l-kitâb Abdullah Çelebi b. el-Hâc Mehmed meclis-i ma‘kūd-ı mezbûrda mahmiye-i mezbûrda bi’l-fi‘il beytülmâli’l-hâs emîni olmağla tereke-i müteveffâ-yı mezbûra vaz‘-ı yed eden fahrü’l-akrân Mustafa Ağa b. Abdullah b. Abdülmennan tarafından husûs-ı âti’l-beyânda müseccel vekîli ve kıbel-i şer‘den husûmet ve redd-i cevâba me’zûn olan Mehmed Çelebi b. Mustafa mahzarında üzerine da‘vâ ve takrîr-i kelâm edip benim vâlidem İsmihan’ın vâlidesi Âişe müteveffâ-yı mezbûr Mustafa Çelebi b. Hüseyin b. İbrahim ile li-ebeveyn karındaşlar olup anaları ismi Şakire ve babaları ismi mezbûr Hüseyin ve dedeleri ismi mezbûr İbrahim ve maskat-ı re’sleri zikr olunan Debbâğ Yunus mahallesidir zâhirde zî-rahm-i mahrem cihetinden tereke-i müteveffâ-yı mezbûra benden gayrı vâris ve âhar müstahık yoğiken müvekkil-i mûmâ-ileyh Mustafa Ağa’nın vekîli mezbûr Mehmed Çelebi bi-gayr-ı hakkın vaz‘-ı yed edip bana teslîmden imtinâ‘ eder suâl olunsun dedikde gıbbe’s-suâl <> mezbûr Mehmed Çelebi cevâbında tereke-i müteveffâ-yı mezbûra vech-i muharrer üzere bi’l-vekâle vaz‘-ı yedini ikrâr ve müdde‘î-i mezbûrun vech-i meşrûh üzere müdde‘âsını inkâr edicek müdde‘î-i mezbûrdan müdde‘âsına mutâbık beyyine taleb olundukda udûl-ı ahrâr-ı ricâl-i Müslimînden zikr olunan Keçeci Pîrî mahallesi sükkânından eş-Şeyh Abdülbaki Efendi b. Ali ve İvaz Efendi kaynı? Hatîb Mehmed Efendi b. Fazlı ve Mustafa Çelebi b. Nurullah li-ecli’ş-şehâde meclis-i ma‘kūd-ı mezbûra hâzırûn olup isre’l-istişhâd fi’l-hakīka müdde‘î-i mezbûr Abdullah Çelebi’nin vâlidesi İsmihan’ın vâlidesi Âişe ile müteveffâ-yı mezbûr Yorgancı Mustafa Çelebi b. Hüseyin b. İbrahim li-ebeveyn karındaşlardır anaları ismi mezbûre Şakire ve babaları ismi mezbûr Hüseyin ve dedeleri ismi mezbûr İbrahim ve maskat-ı re’sleri zikr olunan Debbâğ Yunus mahallesidir zâhirde tereke-i müteveffâ-yı mezbûra cihet-i mezbûreden müdde‘î-i mezbûrdan gayrı vâris ve âhar müstahıkkı olduğu ma‘lûmumuz değildir biz bu husûsa bu vech üzere şâhidleriz [162a] şehâdet dahi ederiz deyü herbiri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm müdde‘î-i mezbûr Abdullah Çelebi meclis-i ma‘kūd-ı mezbûrda vekîl-i mezbûr Mehmed Çelebi mahzarında takrîr-i kelâm edip ber-mûceb-i defter-i kassâm-ı asker vekîl-i mezbûrun ba‘de ihrâci’l-mesârif sahhe’l-bâkī me’hûzu olan para üç akçe hesâbınca yetmiş bin doksan yedi akçeyi yedinden tamâmen alıp kabz eyledim ba‘de’l-yevm tereke-i müteveffâ-yı mezbûra müte‘allık cemî‘ mîrâs da‘vâsından müvekkil-i mûmâ-ileyhin zimmetini ibrâ ve iskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an irsâl olunan Hasan Çelebi b. Abdullah ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 22 min-Cumâdelûlâ sene 1110 Şuhûdü’l-hâl: Çolak Ali Çelebi b. Abdurrahman, Ali Çelebi b. ( ) Berber, Attâr Ali Çelebi b. Mehmed, Abdullah Çelebi b. Mustafa, İshak Çelebi b. Mehmed.