Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 941 Hüküm no: 777 Orijinal metin no: [176a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mahmud Efendi’nin küçük kızı Zeyneb’e Ali Efendi’nin vasi tayin edildiği Mahmiye-i İstanbul’da Emin Nureddin mahallesi ahâlîsinden olup Davudpaşa müderrisi iken bundan akdem vefât eden merhûm Mahmud Efendi b. Hasan’ın sulbiye sagīre kızı Zeyneb’in vakt-i rüşd ü sedâdına değin tesviye-i umûruna kıbel-i şer‘den bir vasî nasb ü ta‘yîn olunmak lâzım ve mühim olmağın mahalle-i mezbûrede sâkin müteveffâ-yı mezbûrun etbâ‘ından hâfızü’l-kitâb el-Hâc Ali Efendi b. Mehmed Efendi emânet ve diyânet ile ma‘rûf ve vesâyet-i mezbûre uhdesinden gelmeğe kemâ-yenbağī kādir idiği zeyl-i vesîkada muharrerü’l-esâmî sikāt-ı Müslimîn haberleriyle lede’ş-şer‘i’l-enver zâhir ve mütebeyyin olmağla hâkim-i muvakkı‘-ı sadr-ı kitâb tûbâ-lehû ve hüsnü-meâb hazretleri mezbûr el-Hâc Ali Efendi’yi sagīre-i mezbûrenin vakt-i rüşd ü sedâdına değin tesviye-i umûruna vasî nasb ü ta‘yîn buyurup ol dahi vesâyet-i mezbûreyi kabûl ve merâsim-i lâzımesini edâya ta‘ahhüd ve iltizâm etmeğin mâ-vaka‘a kayd-şüd. Fî 11 min-Receb sene 1110 Şuhûdü’l-hâl: Ali Efendi b. Ahmed Efendi, Mustafa Efendi, Ahmed Efendi b. İbrahim, Ömer Efendi b. Hasan, Hüseyin Bey b. el-merhûm Halil Paşa, İmâm Ahmed Efendi b. Hamza der-mahalle-i mezbûre, İbrahim Efendi b. Halil İmâm-ı Molla Hüsrev